დუმის დეპუტატები კრემლში, პუტინთან მიიწვიეს

რუსეთის დუმის წევრები 30 სექტემბერს კრემლში მიიწვიეს. ეს ცნობილი გახდა დუმის კომუნისტი დეპუტატის, დენის პარფიონოვის მიერ ტელეგრამ-არხით გავრცელებული შეტყობინებიდან. პარფიონოვის თანახმად, „15:00 საათზე დაიწყება ღონისძიება პრეზიდენტ პუტინის მონაწილეობით“.

კრემლიდან ოფიციალური კომენტარი ჯერჯერობით არ ყოფილა. სხვადასხვა წყაროს ცნობით, პრეზიდენტმა პუტინმა შესაძლოა, ხვალ, 30 სექტემბერს გამოაცხადოს, რომ დონეცკი, ლუგანსკი, ხერსონი და ზაპოროჟიე რუსეთის ნაწილი გახდა და ხელი მოაწეროს ე.წ. შეთანხმებებს უკრაინის ამ ოლქების რუსეთის ფედერაციის შემადგენლობაში შესვლის შესახებ.

თუ პუტინი უკრაინის კიდევ 4 რეგიონის ანექსიას მართლაც 30 სექტემბერს გამოაცხადებს, ფორმალურად ეს პროცესი დასრულებულად არ ჩაითვლება, რადგან სჭირდება საკონსტიტუციო სასამართლოს დასკვნა და დუმის და ფედერაციის საბჭოს მხარდაჭერა.

უკრაინის დონეცკის და ლუგანსკის ე.წ. სახალხო რესპუბლიკების და ხერსონის და ზაპოროჟიეს ოლქების დე ფაქტო, პრორუსულმა ადმინისტრაციებმა 23-27 სექტემბერს ჩაატარეს ე.წ. რეფერენდუმები რუსეთის შემადგენლობაში შესასვლელად. მათ მიერ გამოცხადებული “შედეგებით” ზაპოროჟიეში ამ ოლქის რუსეთის შემადგენლობაში შესვლას მხარი დაუჭირა 93.11%-მა, ლუგანსკში – 98.42%-მა, დონეცკში – 99.23%-მა და ხერსონში – 87.05%-მა. საერთაშორისო თანამეგობრობა ამ ფსევდორეფერენდუმებს არ აღიარებს.

უკრაინის ოლქებში, დონეცკში, ლუგანსკში, ხერსონსა და ზაპოროჟიეში რუსეთის მიერ დანიშნულმა დე ფაქტო ადმინისტრაციებმა ე.წ. რეფერენდუმების 23-27 სექტემბერს ჩატარების გადაწყვეტილება ერთ დღეს, 20 სექტემბერს გამოაცხადეს. ამას წინ უძღოდა უკრაინის არმიის წარმატებული კონტრშეტევა ხარკოვის ოლქის ოკუპირებულ რაიონებზე და რუსი სამხედროებისგან მათი გათავისუფლება. კიევში განაცხადეს, რომ ე.წ. რეფერენდუმები არის ასიმეტრიული პასუხი უკრაინის არმიის კონტრშეტევაზე და ფიქცია, რომელიც არაფერს შეცვლის.

დონეცკის და ლუგანსკის სეპარატისტული რეგიონები, რომლებსაც 2014 წლიდან პრეტენზია “დამოუკიდებლობაზე” ჰქონდათ, რუსეთის პრეზიდენტმა პუტინმა „დამოუკიდებელ რესპუბლიკებად“ გამოაცხადა უკრაინაში რუსეთის არმიის შეჭრამდე რამდენიმე დღით ადრე, 2022 წლის 21 თებერვალს. 2022 წლის გაზაფხულზე რუსეთმა კონტროლი დაამყარა უკრაინის ხერსონის და ზაპოროჟიეს ოლქების დიდ ნაწილზეც. რუსეთს 2014 წლიდან ანექსირებული აქვს უკრაინის ყირიმის ნახევარკუნძულიც.