„დივერსიაა“ – ნინო ლომჯარია „აგენტების კანონპროექტზე“

ყოფილი სახალხო დამცველი, ნინო ლომჯარია პარლამენტში “ხალხის ძალის” მიერ ინიცირებულ კანონპროექტს ეხმაურება და აცხადებს, რომ მისი არა თუ მიღება, არამედ “საპარლამენტო განხილვაში შესვლაც კი არის დივერსია მოწყობილი საქართველოს ევროპული პერსპექტივის გასანადგურებლად”.

ლომჯარია ამბობს, რომ კანონი იზიარებს იმ სულისკვეთებას, რასაც პუტინის რუსეთში მოქმედი კანონმდებლობა.

“უდროო დროს წამოწყებული ინიციატივაა, რბილად რომ ვთქვა, ამ პერიოდში ასეთი ინიციატივაზე მსჯელობის დაწყება საქართველოს პარლამენტში, არის განზრახ გაკეთებული დესტრუქცია საქართველოს ევროპული პერსპექტივის მიმართ. მსგავსი კანონების ფენომენი არის ცნობილი და მისი სახელია “პუტინის კანონები”, უცხოელი აგენტების შესახებ და ერთი ერთში იმეორებს სწორედ ამ სულისკვეთებას. ხელისუფლება თუ ასეთ კანონს მიიღებს, ისინი ამით აღიარებენ, რომ ყველა ჩვენი მოკავშირე და მეგობარი ქვეყანა, რომელიც საქართველოს ეხმარება განვითარებაში, ხელისუფლების და ქვეყნის მტრულ ძლებად წარმოჩინდებიან”, – თქვა ნინო ლომჯარიამ. ცნობისთვის, 14 თებერვალს “ხალხის ძალამ” განაცხადა, რომ პარლამენტში აინიცირებენ კანონპროექტს, რომელიც უცხოური გავლენის აგენტების რეესტრის შექმნას ითვალისწინებს. კანონი საზღვარგარეთიდან შემოსული დაფინანსებით მოქმედი ორგანიზაციების საქმიანობას შეეხება. მათი მტკიცებით, კანონპროექტი აშშ-ში მოქმედი შესაბამისი კანონმდებლობის მიხედვით შეადგინეს და სხვა დემოკრატიული ქვეყნების “საუკეთესო პრაქტიკაც” გაითვალისწინეს.