23 ნოემბერს საქართველოში გიორგობას აღნიშნავენ. სწორედ ამ დღეს წმინდა გიორგი ურმის თვალზე სასტიკად აწამეს. გიორგობას საქართველოში ორჯერ, 6 მაისს და 23 ნოემბერს, აღნიშნავენ.
აღნიშნულ დღესასწაულთან დაკავშირებით დვაბზუს წმინდა გიორგის სახელობის ტაძარში საზეიმო წირვა ჩატარდა, რომელსაც ტაძრის წინამძღვრის, მამა შალვა ჯინჭარაძის გარდა მამა გიორგი სამსონია, მამა გიორგი ბარამიძე, მამა გიორგი კობალავა, მამა გრიგოლ დობორჯგინიძე და მამა დავით ჯანჯღავა აღავლენდნენ.
წირვის დასასრულს მრევლს, მამა გრიგოლ დობორჯგინიძემ მიმართა, მან ტაძარში მყოფთ გიორგობა მიულოცა, კიდევ ერთხელ შეახსენა წმინდანის გავლილი გზა, ბოლოს კი მრევლი დალოცა და მშვიდობა და ჯანმრთელობა უსურვა მათ.
შეგახსენებთ, რომ წმინდა გიორგი რომში, იმპერატორ დიოკლეტიანეს დროს მოღვაწეობდა, სულ მალე ის იმპერატორის მხედართმთავარი გახდა. მოგვიანებით მან კერპთაყვანისმცემლობა დაგმო და ქრისტიანობის ქადაგება დაიწყო. ამის გამო დიოკლეტიანემ ის სასტიკად აწამა. წმინდა გიორგიმ თავისი ცხოვრებით მაგალითი მისცა უამრავ ადამიანს, რომლებიც შემდგომ ქრისტეს სჯულზე მოექცნენ. წმინდა გიორგის სასწაულთაგან ყველაზე უფრო გამორჩეულია მის მიერ გველეშაპის განგმირვა, ეს ფაქტი, ქრისტიანულ სამყაროში სიკეთის ბოროტებაზე გამარჯვების სიმბოლოდაა მიჩნეული.
მასალა პროექტის “ჩვენ ვირჩევთ, ჩვენ ვაკონტროლებთ” ფარგლებში, გენო ვაშაყმაძემ მოამზადა.
Funded through the Alumni Grants Program, U.S. Embassy in Georgia/დაფინანსებულია საქართველოში აშშ-ის საელჩოს ალუმნი საგრანტო პროგრამის ფარგლებში.
Loading ...