“დეპოლარიზაციისკენ გადადგმული არსებითი ნაბიჯი” – შარლ მიშელი ნიკა გვარამიას შეწყალებაზე

ნიკა გვარამიას შეწყალების გადაწყვეტილებას შარლ მიშელი მიესალმება. საქართველოს პრეზიდენტის გადაწყვეტილებას ევროპული საბჭოს პრეზიდენტი დეპოლარიზაციისკენ გადადგმულ ნაბიჯად აფასებს.

შარლ მიშელი განცხადებაში ასევე პოზიტიურად აფასებს ხელისუფლების გადაწყვეტილებას, რომ არ მიიღოს დეოლიგარქიზაციის შესახებ კანონი.

სალომე ზურაბიშვილმა ნიკა გვარამია შეიწყალა. პრეზიდენტმა ინფორმაცია საგანგებო ბრიფინგზე გააკეთა. სალომე ზურაბიშვილი განმარტავს, რომ შეწყალების გადაწყვეტილება მას შემდეგ მიიღო, რაც უზენაესმა სასამართლომ გვარამიას საკასაციო სარჩელი არ დააკმაყოფილა.

თბილისის საქალაქო სასამართლომ 2022 წლის 16 მაისს ნიკა გვარამიას 3 წლითა და 6 თვით პატიმრობა მიუსაჯა, ტელეკომპანია “რუსთავი 2-ის” ხელმძღვანელობის პერიოდში უფლებამოსილების ბოროტად გამოყენების საქმეზე.

ეს გადაწყვეტილება თბილისის საქალაქო სასამართლოს მოსამართლემ მაშინ გამოაცხადა, როცა საქართველოს უკვე ჰქონდა გაკეთებული განაცხადი ევროკავშირის წევრობის კანდიდატის სტატუსის მისაღებად. აშშ-ის საელჩომ ამერიკაში დაგეგმილ პროგრამაში მონაწილეთა სიიდან მოსამართლე ლაშა ჩხიკვაძე ნიკა გვარამიას საქმეზე განაჩენის გამოცხადების შემდეგ ამოიღო.

2022 წლის 2 ნოემბერს სააპელაციო სასამართლომ ნიკა გვარამიას პატიმრობის ვადის ნაწილში გადაწყვეტილება არ შეცვალა. განაჩენი ადვოკატებმა უზენაეს სასამართლოში გაასაჩივრეს.

19 ივნისის განჩინებით, უზენაესმა სასამართლომ ნიკა გვარამიას სარჩელი განსახილველადაც არ მიიღო (დაუშვებლად ცნო).