„დედამისი გადამეფარა“-ნატო გოგელია თავდასხმის დეტალებს იხსენებს

ამ დრომდე არ დაუკავებიათ “ტვ პირველის” ჟურნალისტზე თავდამსხმელი რადიკალი, რომელმაც პარლამენტის სასახლიდან ევროკავშირის დროშა ჩამოხია.

როდესაც ტვ პირველის ჟურნალისტმა  მისი იდენტიფიცირება შეძლო და კითხვების დასასმელად სახლში მიაკითხა, მოძალადე მამაკაცი მას ფიზიკურად გაუსწორდა და ის მობილური ტელეფონი დაუმტვრია, რომლითაც გადაღებას აწარმოებდა.

ნატო გოგელიამ ჩვენება უკვე მისცა, თუმცა თავდამსხმელი ამ  დრომდე თავისუფალია.

“მივედით მასთან სახლში, გამოვიდა, ჩვეულებრივად ყველა კითხვაზე პასუხი გამცა. ეს არ ხდებოდა მისი სახლის შიდა ტერიტორიაზე, იმიტომ რომ მან არ ისურვა ეზოში საუბარი. თქვა, რომ არავინ დაკავშირებია საგამოძიებო უწყებებიდან. დაადასტურა ნამდვილად, რომ ჩამოხსნა და დასაწვავად გადასცა დროშა და თქვა, რომ ამას კიდევ გაიმეორებდა. შემდეგ საუბარში ჩაერთო მოხუცი, სავარაუდოდ მისი მამა, რომელმაც ლანძღვით გვითხრა, რომ უნდა წავსულიყავით და ამას მოჰყვა ანდღულაძის მხრიდან სასწაული აგრესია – სიტყვიერი და ფიზიკური შეურაცხყოფა. პირველი რაც გააკეთა, ეცადა, რომ წაერთმია ტელეფონი და ეს მოახერხა კიდეც, დაამტვრია. შემდეგ ფიზიკური ძალადობა მოახდინა. შემდეგ მისი დედა გადამეფარა და სწორედ ამ დროს მოვახერხე მე იქიდან წამოსვლა”, – ამბობს ნატო გოგელია. 

მამუკა ანდღულაძე “ალტ ინფოს” რადიკალური მოძრაობის წევრია. ის დროშის ჩამოგდების მონაწილე იყო და შემდეგ თანამოაზრეებს დასაწვავად გადასცა.

სპეციალურმა საგამოძიებო სამსახურმა “TV პირველის“ ჟურნალისტის მიმართ პროფესიულ საქმიანობაში უკანონოდ ხელის შეშლის ფაქტზე გამოძიება დაიწყო.

წყარო-ტვ პირველი