დაფიქსირდა თუ არა საქართველოში კოვიდის ახალი შტამი, შემდეგ კვირას გახდება ცნობილი – გამყრელიძე

დაავადებათა კონტროლის ეროვნული ცენტრის ხელმძღვანელი ამირან გამყრელიძე აცხადებს, რომ საქართველოში კორონავირუსის ახალი შტამის რამდენიმე საეჭვო შემთხვევას აქვს ადგილი. ამის შესახებ NCDC-ის ხელმძღვანელმა tv “პირველზე“ ინგა გრიგოლიას გადაცემა რეაქციაში ისაუბრა.

მისი თქმით, ლუგარის ლაბორატორიაში გენომის სეკვენირება ერთ შემთხვევაზე დაიწყო და შედეგები რამდენიმე დღეში, სავარაუდოდ, მომავალი კვირის ხუთშაბათს გახდება ცნობილი, ხოლო 2 საეჭვო შემთხვევაზე კი, ნიმუშებს ეძებენ.

„გენომის სეკვენირება ერთ შემთხვევაზე მიმდინარეობს. სეკვენირება ნიშნავს გენის დაშლას და შემდეგ შედარებას, არის თუ არა მუტაცია გენომში. ეს საკმაოდ რთული სამუშაოა. შემდგომ უკვე ლუგარის ლაბორატორიის შესაბამის დეპარტამენტს დავალება აქვს მიღებული, რომ გაკეთდეს შესაბამისი პროტოკოლი, პერმანენტულად, შემთხვევითობის პრინციპით რომელ ჯგუფებზე გაკეთდეს მსგავსი კვლევები, რადგან გენომის სეკვენირება ყოველდღიური კვლევა ვერ იქნება და არც იაფი სიამოვნებაა; საკმაოდ ძვირი სიამოვნებაა, როცა გენს მთლიანად შიფრავ’’, – განაცხადა ამირან გამყრელიძემ.

ამასთან, როგორც NCDC-ის ხელმძღვანელი აცხადებს, ზოგადად, რესპირაციულ ვირუსებს, რომელშიც კორონავირუსიც შედის, მუტაციები ახასიათებთ, მაგრამ კოვიდზე მეტი აგრესიულობა არ ახასიათებთ. 

„ამ შტამის შესახებ ჯერ კიდევ სექტემბერში იყო საუბარი. პირველად ის დიდ ბრიტანეთში გამოჩნდა და შემდეგ დაკვირვება და კვლევა მიდიოდა. იქ აქვთ იმის საშუალება. დეკემბრის შუა რიცხვებში ითქვა, რომ ახალ შტამის ცირკულირება დაიწყო. არსებული ინფორმაციით, მას არ ახასიათებს მეტი აგრესიულობა, რომ მეტად მძიმე შემთხვევებს რომ იწვევდეს, მაგრამ აქვს მეორე თვისება, თითქოს უფრო ახალგაზრდებს აზიანებს და ამავე დროს სწრაფად ვრცელდება. ეს ყველაფერი ჯერ წინასწარი ვარაუდებია და არაა ჩატარებული დიდი კვლევები, რომელიც ამას დამტკიცებს, თუმცა მას შემდეგ, რაც დიდ ბრიტანეთში დაფიქსირდა ახალი შტამი და გამახვილდა ყურადღება, აღმოჩნდა, რომ ის უკვე ევროპის 8 ქვეყანაშია დაფიქსირებული და სხვა ქვეყნებშიც ვრცელდება“, – განაცხადა ამირან გამყრელიძემ და დასძინა, რომ საქართველოშიც ამის შემდეგ მიექცა ყურადღება.

ჟურნალისტის კითხვაზე – როგორია საქართველოს ჯანდაცვის სისტემის მზაობა კოვიდის ახალ შტამთან დაკავშირებით, NCDC-ის ხელმძღვანელმა თქვა, რომ როგორც კი ახალი შტამი დადატურდა დიდ ბრიტანეთში, მთავრობის საკოორდინაციო საბჭოს გადაწყვეტილებით, ის პირები, რომლებიც ბრიტანეთიდან საქართველოში ბრუნდებიან, 12 დღით სავალდებულო საკარანტინო სივრცეებში მოთავსდებიან.