გურია საქართველოს ერთ-ერთი ყველაზე მრავალფეროვანი და უნიკალური რეგიონია, რომელიც ერთდროულად აერთიანებს შავი ზღვის სანაპიროს, მთის კურორტებს, სამკურნალო წყლებს და უნიკალურ კლიმატს. ეს არის ადგილი, სადაც ზღვის ნიავი და მთის ჰავა ერთმანეთს ერწყმის, ხოლო ბუნება, ტრადიციები და სტუმართმოყვარეობა – გურიის განუყოფელი ნაწილია.
ზღვისპირა კურორტები
ურეკი
გურიის ყველაზე ცნობილი კურორტია შავი ზღვის სანაპიროზე. ურეკი გამოირჩევა უნიკალური მაგნიტური ქვიშით, რომელსაც სამკურნალო თვისებები აქვს – ძალიან ეფექტურია ძვალ-სახსროვანი და ნერვული სისტემის დაავადებების სამკურნალოდ. განსაკუთრებით პოპულარულია ბავშვიანი ოჯახებისთვის. პლაჟები ფართეა, წყალი თბილი და დაბალი. შესაბამისად, ბავშვებთან ერთად ამ პლაჟზე დასვენება ნაკლებად საშიშია.
შეკვეთილი
ურეკთან ახლოს მდებარე შეკვეთილი თანამედროვე და ახალგაზრდული განწყობის კურორტია. იგი გამოირჩევა, როგორც ბუნებით, ისე ინფრასტრუქტურით – აქ განთავსებულია ”Black sea arena” – ცნობილი საკონცერტო დარბაზი, სადაც ზაფხულში არაერთი ღონისძიება ეწყობა, ატრაქციონების პარკი ”ციცინათელა”, მუსიკოსთა პარკი, სადაც ცნობილი მუსიკოსების სკულპტურები დაგხვდებათ. მინიატურების პარკი, სადაც საქართველოს ცნობილი არქიტექტურული ძეგლებია. შეკვეთილი განსაკუთრებით მიმზიდველია მათთვის, ვისაც სურს ზღვისპირა აქტიური დასვენება.
მთის კურორტები
ბახმარო
ბახმარო ზღვის დონიდან 2050 მეტრზე მდებარე კურორტია, რომელიც ცნობილია თავისი უნიკალური ჰავით – იგი ერთდროულად აერთიანებს ზღვისა და მთის კლიმატის მახასიათებლებს. რეკომენდებულია სასუნთქი გზების დაავადებების მქონე პირებისთვის. ბახმაროს მინდვრები, ცხენოსნობა, ტყეები და მზე ღრუბლებზე – ეს კადრები ხშირია როგორც ტურისტების ფოტოებში, ისე გურულ ფოლკლორში.
გომის მთა
გომის მთა ბახმაროზე მაღლა მდებარე მაღალმთიანი კურორტია. იგი უფრო რთულად მისადგომია, მაგრამ საოცარი ხედებითა და ღრუბლებზე მოთავსებული სახლებით ბევრს იზიდავს. გომის მთაზე საღამოობით ჰაერი მკვეთრად გრილდება – რეკომენდებულია თბილი ტანსაცმლის წაღება.
სამკურნალო და მინერალური წყლები
ნაბეღლავი
გურიის ერთ-ერთი მთავარი მინერალური წყლის კურორტია. ადგილობრივი წყალი – „ნაბეღლავი“ – ცნობილია არა მხოლოდ საქართველოში, არამედ საზღვარგარეთაც. სოფელი ნაბეღლავი ჩოხატაურის მუნიციპალიტეტში მდებარეობს და ტურისტებისთვის საინტერესოა როგორც დასვენების, ისე ბუნების კუთხით.
ბახმაროს წყაროები
მთის სუფთა წყალი და ბახმაროს ტყის ნისლიანი ჰავა ერთად ქმნის ჯანმრთელობისთვის სასარგებლო პირობებს – განსაკუთრებით ბავშვებისა და ხანდაზმულებისთვის.
….
გურიის კურორტები ზღვას, მთას და სამკურნალო წყლებს აერთიანებს – ყველაფერი ერთ რეგიონში. ეს ადგილი შესანიშნავია ოჯახური დასვენებისთვის, სამკურნალო მიზნებისთვის ან ბუნებასთან ახლოს ყოფნის მსურველთათვის. დაგეგმეთ თქვენი ზაფხული გურიაში – ნამდვილად არ ინანებთ და აქ დაბრუნება აუცილებლად მოგინდებათ.
Loading ...