დასავლეთიდან თბილისში შემოსასვლელად და გასასვლელად ახალი გზა აშენდება, ასევე დაიწყება ლილოს შემოვლითი გზის პროექტიც – მთავრობის გეგმა

დასავლეთიდან თბილისში შემოსასვლელად და გასასვლელად ახალი გზა აშენდება, ასევე დაიწყება ლილოს შემოვლითი გზის პროექტიც, – ამის შესახებ ფინანსთა მინისტრმა ლაშა ხუციშვილმა პარლამენტის პლენარულ სხდომაზე 2025 წლის ბიუჯეტის პროექტის განხილვის დროს განაცხადა.

როგორც ლაშა ხუციშვილმა საკანონმდებლო ორგანოში გამოსვლისას განაცხადა, ბიუჯეტის პროექტით, საგზაო ინფრასტრუქტურის გაუმჯობესებისთვის ჯამში გამოყოფილია 1.590 მლრდ ლარზე მეტი. მათ შორის, ჩქაროსნული მაგისტრალის მშენებლობაზე გათვალისწინებულია 900 მლნ ლარზე მეტი.

„მომდევნო წლებში დაგეგმილია ბათუმი-სარფის, ქოულეთის დამატებითი 2 ზოლის, ანაკლიის პორტამდე მისასვლელი, ლილოს შემოვლითი გზის, დასავლეთიდან თბილისში ახალი შემოსასვლელის და გასასვლელის, წიწამური-ჟინვალის, ბადიაური-ჩალაუბნის, გურჯაანი-თელავის ასაქცევი და ლაგოდეხის შემოვლითი გზების მშენებლობების დაწყება,“ – განაცხადა ხუციშვილმა.

www.bpn.ge