რუსეთის მოსახლეობის თითქმის სამი მეოთხედი უკრაინაში ომს ემხრობა და აქვს დადებითი ემოციები როგორიცაა, სიამაყე, სიხარული, პატივისცემა, ნდობა და იმედი.
ამას მოწმობს ორი გამოკითხვა, რომლებიც ჩაატარეს რუსეთის დამოუკიდებელმა სოციოლოგებმა ერთ ნახევარი კვირის ინტერვალით თებერვლის ბოლოდან მარტის შუამდე. შედეგებს გაეცნო რადიო თავისუფლება.
გამოკითხვის ავტორების თანახმად, პოზიციები განსხვავებულია ასაკის მიხედვით. 35 წლის ასაკზე უფროსი მოქალაქეები გამოხატავენ სიამაყეს, პატივისცემას და იმედს. 18 წლამდე ასაკის რესპონდენტებს მეტი მიდრეკილება აქვთ უკმაყოფილების და იმედგაცრუებისკენ. რუსეთის ხუთი მოქალაქიდან ორი, შეშფოთებული ომის გამო და ამ გრძნობას უფრო ხშირად ახალგაზრდები გამოხატავენ.
25-44 წლის ასაკამდე მოქალაქეები ხშირად გამოხატავენ განგაშისა და შიშის გრძნობას „სამხედრო ოპერაციის“ გამო. 55 წელს გადაცილებულთა ნახევარზე მეტი უკრაინასთან ომს მხარს უჭერს.
პირველ და მეორე გამოკითხვას შორის გიზარდა მათი რიცხვი, ვინც ემხრობა „სამხედრო ოპერაციას“ და უკრაინის სეპარატისტული რეგიონების დამოუკიდებლობას. ამავე დროს იზრდება პესიმიზმი საკუთარი ფინანსური მდგომარეობის გამო რუსეთისთვის დასავლეთის მიერ დაწესებული სანქციების გამო.
გამოკითხვებმა ასევე აჩვენეს, რომ რუსეთის მოსახლეობის სამი მეოთხედი ომის ამბებს ტელევიზიიდან იტყობს. მათგან 87 პროცენტი (რუსეთის მოსახლეობის 64 პროცენტი) სახელმწიფო არხებიდან იღებს ომის ცნობებს.
სოციოლოგები თვლიან, რომ რუსეთის ახალგაზრდა, 35 წლამდე მოქალაქეები – დიდი ალბათობით ნაწილობრივი ან სრული უნდობლობით უყურებენ უკრაინის შესახებ ცნობებს, ვიდრე უფროსები. ამასთან, გამოკვლევის ავტორები წერენ, რომ ახალგაზრდა რუსები, 18-24 წლამდე ასაკის მოქალაქეები, ხშირად გამოთქვამენ უკრაინის ამბების მიმართ გულგრილობას.
შეკითხვაზე, როგორ ზემოქმედებს მათზე რუსეთის პრეზიდენტის ქმედება, რესპონდენტების მესამედმა განაცხადა, რომ მტკიცედ სჯერა, რომ პუტინი მათი ინტერესებისთვის მუშაობს. 26-მა პროცენტმა თქვა, რომ ის გარკვეულწილად მუშაობს მათი ინტერესებისთვის. მთლიანობაში რუსების უმეტესობა თვლის, რომ უკეთესი იქნებოდა პუტინი პრეზიდენტად რომ დარჩენილიყო, რაც შეიძლება დიდხანს. ეს აზრი განსაკუთრებით გავრცელებულია იმ რუსებს შორის, ვინც ტელევიზიით იღებს ინფორმაციას. რუსეთის ის მოქალაქეები, რომლებიც პირადი კავშირების და ციფრული მედიის გზით იღებენ ცნობებს, პრეზიდენტს სხვაგვარად აღიქვამენ, წერია რუსეთის დამოუკიდებელი სოციოლოგების მიერ ჩატარებულ გამოკვლევაში.
www.radiotavisupleba.ge
Loading ...