ტყიბულის მუნიციპალიტეტში მეწყრული პროცესების შედეგად რამდენიმე სახლი დაინგრა და ამასთან, საავტომობილო გზაც დაზიანდა, სადაც ამ დროისთვის გადაადგილება შეზღუდულია. ამის შესახებ BMG-ს ტყიბულის მუნიციპალიტეტის მერიაში განუცხადეს.
კერძოდ, ტყიბულის მუნიციპალიტეტის მერიის ინფორმაციით, შიდასახელმწიფოებრივი მნიშვნელობის ქუთაისი(მოწამეთა)-ტყიბული-ამბროლაურის საავტომობილო გზის მე-6 კმ-ზე განვითარებული მეწყრული პროცესების გამო, დაზიანებულია საავტომობილო გზის სავალი ნაწილი, რის გამოც, აღნიშნულ მონაკვეთზე, დროებით აკრძალულია ყველა სახის ავტოტრანსპორტის მოძრაობა. დაკეტვის პერიოდში, ავტოტრანსპორტი იმოძრავებს სოფელ მაღაროს გავლით, ადგილობრივი მნიშვნელობის საავტომობილო გზის გამოყენებით.
მერიის ცნობითვე, სოფელ კურსებში მეწყრული პროცესების განვითარების გამო, ბეროძეებისა და გოგოლაშვილების უბნიდან 45 ოჯახია ევაკუირებული.
“უსაფრთხოების მიზნით მეწყრული ზონიდან 45 ოჯახის ევაკუაცია მოხდა. ისინი დროებით სასტუმროებში არიან განთავსებული და სრულად უზრუნველყოფილი არიან პირველადი საჭიროების ნივთებითა და მედიკამენტებით.
სოფელ კურსებში, ბეროძეებისა და გოგოლაშვილების უბანში განვითარებული მეწყრული პროცესების გამო შექმნილი საგანგებო შტაბი მუშაობას 24-საათიან რეჟიმში აგრძელებს”,- აღნიშნავენ მერიაში.
Loading ...