მსოფლიო ანტიდოპინგური სააგენტოს ინფორმაციით, მსოფლიო ანტიდოპინგური სააგენტოს და World Rugby-ის ერთობლივი გამოძიების შედეგად, დადასტურდა ანტიდოპინგური წესების დარღვევა საქართველოს მორაგბეთა ეროვნული ნაკრების 6 მოთამაშისა და სპორტსმენთა დამხმარე პერსონალის 1 წევრის მხრიდან.
გამცხადებაში წერია, რომ 2023 წელს დაწყებულმა ოპერაცია Obsidian-მა გამოიძია ბრალდებები, რომ მოთამაშეები წესების აშკარა დარღვევით სინჯების ჩანაცვლებაში იყვნენ ჩართულნი. გამოძიების ანგარიში ავლენს 5 შემთხვევას, როდესაც სინჯების ჩანაცვლება მოხდა. ასევე დადგინდა, რომ საქართველოს მორაგბეთა ნაკრების მოთამაშეებს დოპინგ-ტესტირების შესახებ წინასწარ აფრთხილებდნენ საქართველოს ანტიდოპინგური სააგენტოს (GADA) თანამშრომლები. გამოძიებამ ასევე დაადგინა, რომ დოპინგ-კონტროლის ოფიცრები არ აკვირდებოდნენ დოპინგ-კონტროლისთვის შერჩეულ სპორტსმენებს და არ ესწრებოდნენ შარდის ჩაბარების პროცესს, რაც წესების მიხედვით აშკარა დარღვევას წარმოადგენს.
“ის, რაც ქართულ რაგბში ხდებოდა, აღმაშფოთებელი და შოკისმომგვრელია როგორც ქართული სპორტისა და მთავრობისთვის, ისე მსოფლიო რაგბისთვის. მინდა მადლობა გადავუხადო WADA-ს დამოუკიდებელი დაზვერვისა და გამოძიების გუნდს მათი მონდომებისა და პროფესიონალიზმისთვის, რომლებმაც ეს ოპერაცია მიზანმიმართულად და შეუპოვრად აწარმოეს. ასევე ვაფასებ World Rugby-ის მზადყოფნას გამოავლინოს ფაქტების და ითანამშრომლოს WADA-სთან, რათა მიიღოს ძლიერი შედეგი რაგბისთვის.
ეს ისტორია აქ არ მთავრდება, რადგან ახლა მიმდინარეობს დამატებითი გამოძიება, რომელიც საქართველოს სპორტში უფრო ღრმად შეისწავლის ვითარებას. WADA-მ ოპერაცია Obsidian-ის შედეგები საქართველოს მთავრობასაც მიაწოდა, რათა გადაიჭრას საქართველოს ანტიდოპინგურ სააგენტოსთან დაკავშირებული პრობლემები. შემდეგი ნაბიჯების განხილვის ფონზე აშკარაა, რომ WADA-მ დაკარგა ნდობა საქართველოს ანტიდოპინგური სააგენტოს (GADA) ანტიდოპინგური პროგრამის მიმართ და შესაბამისმა ორგანოებმა ახლა საფუძვლიანი ცვლილებები უნდა გაატარონ.” – განაცხადა WADA-ს პრეზიდენტმა, ვიტოლდ ბანკამ.
მსოფლიო ანტიდოპინგური სააგენტო აგრეთვე წერს, რომ ოპერაცია Obsidian-მა თავისი დასკვნები წარუდგინა WADA-ს შესაბამისობის სამუშაო ჯგუფს (Compliance Taskforce). საქართველოში ანტიდოპინგური პროგრამის კეთილსინდისიერებასთან დაკავშირებული მუდმივი რისკის და საქართველოს მთავრობის მიერ მიღებული ზომების გათვალისწინებით, სამუშაო ჯგუფმა შესაძლოა განიხილოს საქართველოს ანტიდოპინგური სააგენტოს (GADA) წინააღმდეგ დაჩქარებული შესაბამისობის პროცედურის დაწყება.
შემდგომი ნაბიჯის ფარგლებში, WADA-მ ამოიღო საქართველოში სხვა სპორტის სახეობების წარმომადგენელი სპორტსმენებისგან აღებული ნიმუშები. ამ სპორტსმენთა ბიოლოგიური პასპორტების ექსპერტული შეფასება უკვე მიმდინარეობს. თუ ნიმუშები სინჯის შესაძლო ჩანაცვლების გამო საეჭვოდ შეფასდება, ოპერაცია Obsidian შესაბამის ანტიდოპინგურ ორგანიზაციებს შეატყობინებს და მათ დნმ-ის ანალიზისა და შედარების პროცესში გაუწევს ხელმძღვანელობას.
Loading ...