2023-2024 წლებში გურიაში, კერძოდ კი ჩოხატაურის მუნიციპალიტეტში განხორციელდა პროექტი „გურიის ხილი“, რომელიც დაფინანსდა პოლონეთის რესპუბლიკის საგარეო საქმეთა სამინისტროს მიერ, „პოლონური დახმარების“ განვითარებისა და ჰუმანიტარული დახმარების პროგრამის ფარგლებში.
2023 წელს ხელი მოეწერა თანამშრომლობის ხელშეკრულებას ტარჩინის მუნიციპალიტეტსა (პოლონეთი) და გურიის ვაზისა და ღვინის კლასტერს შორის. აღნიშნული თანამშრომლობის ფარგლებში, ტარჩინის მუნიციპალიტეტის მხარდაჭერით სოფელ ზემო ფარცხმაში გარემონტდა და მოეწყო გურიის ხილის ინკუბატორის შიდა სივრცე, განხორციელდა არაერთი სახის ტექნიკისა და აგრეგატის შესყიდვა. შესყიდული დანადგარების გამოყენება კი შესაძლებელია ციტრუსისა და სხვა ადგილობრივი ხილის დასამუშავებლად და მისგან საბოლოო პროდუქტის მისაღებად.
აღნიშნული ინკუბატორი და ყველა ის მოწყობილობა, რომლის შეძენაც პროექტის ფარგლებში მოხდა, არის საერთო საკუთრებისა და საერთო მოხმარების. ეს კი ნიშნავს იმას, რომ ჩოხატაურის მოსახლეობას შეეძლება მოიტანოს ადგილზე ხილი, დაწურონ, მოახდინონ მისი პასტერიზაცია და ჩამოასხან ბოთლებსა თუ ე.წ. Bag-in-box სტილის შეფუთვებში. ინკუბატორით სარგებლობა ადგილობრივი მოსახლეობისთვის იქნება უსასყიდლო. ფერმერებს მოუწევთ მხოლოდ და მხოლოდ მინიმალური საექსპლუატაციო ხარჯების დაფარვა.
გურიის ხილის ინკუბატორში დამუშავებულ პროდუქციას, ასევე მიენიჭება ხარისხის სერტიფიკატი, რომელსაც ექნება QR კოდის სახე. აღნიშნული QR კოდი დაიტანება პროექტის დროს შემუშავებულ ბრენდირებულ ეტიკეტებზე, რომლის საშუალებითაც მომხმარებელს შეეძლება დეტალური ინფორმაციის გაგება მეწარმესა და მის სხვა პროდუქტებზე.
ინკუბატორით სარგებლობის სურვილის შემთხვევაში, შესაძლებელია საიტის მეშვეობით სასურველი დროის დაჯავშნა: https://guriafruits.org/
პროექტის მიზანია ხელი შეუწყოს ადგილობრივი მეწარმეობის განვითარებას და დააკავშიროს მომხმარებლები მწარმოებლებთან ონლაინ მაღაზიის საშუალებით F2F (Farm to Fork/ფერმერიდან მაგიდამდე) ფორმულის მიხედვით. პროექტი განხორციელდა ჩოხატაურის მუნიციპალიტეტის მერიის ხელშეწყობით.
Loading ...
