გურიის გუნდებმა მეოთხე ლიგა მარცხით დაიწყეს

დღეს სტარტი აიღო საქართველოს საფეხბურთო ჩემპიონატის მეოთხე ლიგამ.

თავიანთი პირველი შეხვედრები გამართეს გურიის გუნდებმა.

ოზურგეთის “მერცხალმა” სტუმრად მარნეულში იასპარეზა, სადაც “ალგეთს” შეხვდა.

შეხვედრა სტუმრების უპირატესობით დაიწყო და ისინი დაწინაურდნენ კიდეც. გოლი მე-19 წუთზე გიორგი ჭანუყვაძემ გაიტანა. თუმცა მასპინძლებმა პირველივე ტაიმშივე მოახერხეს თამაშის შემობრუნება და ორი გოლი გაუტანეს “მერცხალს”. მეორე ტაიმში მასპინძლებმა კიდევ ერთხელ გაიტანეს, საბოლოოდ “ალგეთმა” გაიმარჯვა 3-1.

საკუთარ მოედანზე, დიდი ანგარიშით დამარცხდა ჩოხატაურის “ბახმარო”, რომელიც წელს მესამე ლიგიდან დაქვეითდა. ჩოხატაურელებმა “ვესტ ჯორჯიას” უმასპინძლეს და დიდი ანგარიშით დამარცხდნენ 2-6.

მომდევნო შეხვედრას “მერცხალი” 9 აპრილს გამართავს და ოზურგეთში მარტვილის “მერანი 2”-ს უმასპინძლებს.

მატჩი ოზურგეთის ცენტრალურ სტადიონზე 15 საათზე დაიწყება.

რაც შეეხება “ბახმაროს”, ისინი 8 აპრილს, სტუმრად “არაგვი 2”-ს შეხვდებიან.