ამ დღეებში ცნობილი გახდა, რომ ოზურგეთის სოფლებში ახალგაზრდა მამაკაცი მოსახლეობას ხვდება და მათი მდგომარეობის, პრობლემებისა და საჭიროებების შესახებ ინფორმაციას აგროვებს. როგორც სოფლების მკვიდრნი გვეუბნებიან, ახალგაზრდა მამაკაცი ამბობს, რომ გურიის გუბერნატორობას აპირებს. მანამდე კი სურს მოსახლეობა გაიცნოს და მათი ცხოვრების სპეციფიკაში სიღრმისეულად გაერკვეს.
როგორც გავარკვიეთ, ეს ახალგაზრდა მამაკაცი წარმოშობით ჩოხატაურელი მიხეილ გუბელიძეა. აღმოჩნდა, რომ ის გურიის რეგიონის სამივე მუნიციპალიტეტის მოსახლეობას, უკვე ორ წელზე მეტია, ხვდება.
”ამ შეხვედრებს, ერთგვარად, ჩემი პირადი დისერტაცია შეიძლება ვუწოდოთ” – ამბობს მიხეილ გუბელიძე. – ” უკვე ორი წელია, მოსახლეობასთან პირისპირ შეხვედრები მაქვს, რათა მათი ცხოვრების შესახებ მეტი გავიგო. სიღრმისეულად გავერკვე მათ პრობლემატიკაში და მოგვარების გზებზე ვიფიქრო.უკვე ვიყავი ჩოხატაურისა და ლანჩხუთის თითქმის ყველა სოფელში და ამჟამად ოზურგეთის სოფლებში მცხოვრებ მოსახლეობას ვხვდები.”
მიხეილ გუბელიძე არ გამორიცხავს პოლიტიკურ კარიერასაც და არც იმას უარყოფს, რომ გურიის გუბერნატორობა სურს. კარგად იცის, რომ გუბერნატორის თანამდებობა არჩევითი არ არის, ამიტომ თამამად აცხადებს, რომ შეხვედრები მოსახლეობასთან მათი ხმების მოზიდვას სულაც არ უკავშირდება.
” არ ვარ არცერთი პარტიის ან პოლიტიკური ორგანიზაციის წევრი. სრულიად დამოუკიდებლად ვმოქმედებ. მას შემდეგ, რაც ხალხთან შეხვედრებს დავასრულებ, ხელისუფლებას ამ ინფორმაციას სიღრმისეული კვლევის სახით გავაცნობ და მოსახლეობის პრობლემების მოგვარების ჩემეულ გეგმას და სტრატეგიას შევთავაზებ” – აცხადებს ”გურიაTV”-თან მიხეილ გუბელიძე.
მიხეილ გუბელაძე წარმოშობით ჩოხატაურიდან, სოფელ საჭამიასერიდან არის. ხუთი წლის მანძილზე ჩეხეთის დედაქალაქ პრაღაში ცხოვრობდა, სადაც სოფლის მეურნეობის მიმართულებით აკადემიური განათლება მიიღო. ასევე, დამთავრებული აქვს საქართველოს ტექნიკური უნივერსიტეტის ბიზნესის მართვის ფაკულტეტი. არის Microsoft Power BI – ის მასტერი. პრაღასა და თბილისში ცხოვრების შემდეგ საცხოვრებლად ჩოხატაურში, სოფელ საჭამიასერში დაბრუნდა და მოსახლეობასთან შეხვედრებს აქტიურად განაგრძობს.
Loading ...