გარემოს დაცვისა და სოფლის მეურნეობის მინისტრი დავით სონღულაშვილი ქალაქ ოზურგეთში, კომპანია „გრინგოლდის“ თანამედროვე სტანდარტებით აღჭურვილ ჩაის გადამმუშავებელ საწარმოში წარმოების პროცესს გაეცნო.
მინისტრი ჩაის წარმოებაში ჩართულ ფერმერებს შეხვდა და დარგში არსებულ გამოწვევებზე მიიღო ინფორმაცია.
საქართველოს კლიმატური და ნიადაგური პირობები სუბტროპიკული კულტურების, მათ შორის ჩაის წარმოების ფართო შესაძლებლობას იძლევა. საქართველოში ყოველწლიურად იზრდება მოთხოვნა ადგილობრივი წარმოების ეკოლოგიურად სუფთა ჩაის პროდუქციაზე. მოთხოვნა მზარდია საერთაშორისო ბაზრებზეც. ჩაის პლანტაციების რეაბილიტაციის სახელმწიფო პროგრამის განხორციელების უმთავრესი მიზანიც საქართველოში არსებული ჩაის პლანტაციების პოტენციალის მაქსიმალური გამოყენება და ჩაის წარმოების ხელშეწყობაა.
შპს „გრინგოლდი“ სოფლის განვითარების სააგენტოს ბენეფიციარია. ჩაის საწარმოს შექმნისა და განვითარების ეტაპზე კომპანიამ მიიღო საგრანტო თანადაფინანსება „გადამმუშავებელი და შემნახველი საწარმოების თანადაფინანსების“ პროგრამით და რამდენჯერმე ისარგებლა პროექტით „შეღავათიანი აგროკრედიტი“. კომპანიას ჩაის პლანტაციების რეაბილიტაციის სახელმწიფო პროგრამის ფარგლებში 28 ჰა ჩაის პლანტაციის რეაბილიტაციისთვის მიღებული აქვს სახელმწიფო თანადაფინანსება.
ჩაის გადამმუშავებელი საწარმო სეზონზე 65 ტონა ჩაის ფოთოლს გადაამუშავებს. პროდუქციის რეალიზაცია ხდება როგორც ადგილობრივ, ასევე საერთაშორისო ბაზრებზე. გადამმუშავებელ საწარმოში 15 ადამიანია დასაქმებული. დანერგილია სურსათის უვნებლობის საერთაშორისო სტანდარტები; კომპანია ფლობს Organic სერტიფიკატს. საწარმოში მზადდება სხვადასხვა ხარისხისა და დაფასოების, დაახლოებით, 20 სახეობის ჩაი.
აღსანიშნავია, რომ სოფლის განვითარების სააგენტოს „გადამმუშავებელი და შემნახველი საწარმოების თანადაფინანსების პროგრამის“ ფარგლებში 132 მლნ ლარზე მეტით თანადაფინანსებულია 287 საწარმოს შექმნა, მათ შორის გურიის რეგიონში 13 საწარმოს შექმნა 5,7 მლნ ლარით.
მინისტრთან ერთად, ადგილზე მინისტრის მოადგილე კახა კაკაბაძე, სახელმწიფო რწმუნებული გურიის მხარეში გიორგი ღურჯუმელიძე, სურსათის ეროვნული სააგენტოს უფროსის მოადგილე გიორგი იაკობაშვილი, სოფლის განვითარების სააგენტოს დირექტორის მოვალეობის შემსრულებელი გიორგი ავალიანი და ადგილობრივი თვითმმართველობების წარმომადგენლები იმყოფებოდნენ.
ინფორმაციას გარემოს დაცვისა და სოფლის მეურნეობის სამინისტროს პრესსამსახური ავრცელებს.
Loading ...