გურიაში პირველი ადგილობრივი რადიო იწყებს მაუწყებლობას

გურიის რეგიონს ისტორიული სიახლე აქვს – ოფიციალურად დაფუძნდა პირველი ადგილობრივი რადიო – „რადიო გურია“, რომელმაც საქართველოს კომუნიკაციების ეროვნული კომისიისგან მაუწყებლობის ლიცენზია მიიღო.

„რადიო გურია“ იმუშავებს FM 94.5 MHz (ოზურგეთი); FM 93.3 MHz (ჩოხატაური); FM 98.3 MHz (ბახმარო) სიხშირეებზე და მაუწყებლობას განახორციელებს გურიის მთელ რეგიონში, მათ შორის მხარის კურორტებში: ბახმაროში, ურეკში, შეკვეთილსა და გრიგოლეთში. ეთერი  მოიცავს საინფორმაციო, შემეცნებით, მუსიკალურ და გასართობ გადაცემებს.

„ეს არის მნიშვნელოვანი დღე გურიისთვის – პირველად ჩვენს რეგიონს ექნება საკუთარი რადიო, რომელიც ხალხის ხმას, ისტორიებსა და კულტურას გაავრცელებს. “რადიო გურია” იქნება პლატფორმა, სადაც ადგილობრივი თემები მთავარი ყურადღების ცენტრში აღმოჩნდება,“ — აღნიშნა „რადიო გურიას“ დირექტორმა ჯაბა გველებიანმა.

რადიოს მთავარი სტრატეგიული პარტნიორი იქნება ტელეკომპანია „გურიაTV“, რომელიც საკუთარ მრავალწლიან გამოცდილებასა და რესურსებს გამოიყენებს, რათა ახალი რადიოპროექტი წარმატებით განვითარდეს. მაყურებელსა და მსმენელს ექნება შესაძლებლობა, მიიღოს სინქრონული ინფორმაცია, როგორც ტელევიზიის, ისე რადიოს საშუალებით. „რადიო გურია“-ს პროგრამები და მიზნები მოიცავს: . გადაცემებს ადგილობრივი და რეგიონული სიახლეების შესახებ, კულტურულ და საზოგადოებრივ თემებზე საუბრებს, თანამედროვე, უცხოურ და ქართულ  მუსიკალურ რუბრიკებს. სპეციალურ სარეკლამო ბლოკებს ბიზნესებისთვის. პროექტი მიზნად ისახავს გურიაში მედიაგარემოს გაძლიერებას, ინფორმაციის ხელმისაწვდომობის ზრდას და ადგილობრივი ინიციატივების მხარდაჭერას.

ამ ეტაპზე დაწყებულია მოსამზადებელი სამუშაოები. “რადიო გურიას” მოსმენა გურიის მოსახლეობას ახლო მომავალში შეეძლება.