გურიაში გზების გაწმენდითი სამუშაოები მიმდინარეობს

რეგიონში დიდთოვლობასთან დაკავშირებით გურიის სამხარეო ადმინისტრაცია ინფორმაციას ავრცელებს.

“დიდთოვლობის გამო გურიის რეგიონის სამივე მუნიციპალიტეტში სპეციალური ტექნიკის საშუალებით უწყვეტ რეჟიმში მიმდინარეობს გზების გაწმენდითი სამუშაოები.

მუნიციპალიტეტებში სპეციალური ტექნიკა ნალექის დაწყების დღიდან მზადყოფნაშია და ყველა შესაბამისი სამსახური საგანგებო რეჟიმში აგრძელებს მუშაობას.

ამ ეტაპისთვის ელექტროენერგია არ მიეწოდება ოზურგეთისა და ლანჩხუთის გარკვეულ უბნებს, რაც შეეხება ჩოხატაურს პრობლემურ მონაკვეთებში ელექტროენერგიისა და ბუნებრივი აირის მიწოდება აღდგენილია.

დაზიანებულ უბნებში სარეაბილიტაციო სამუშაოებს აწარმოებენ ,,ენერგო პრო ჯორჯიასა“ და ,,სოკარ გაზის“ ტექნიკური ჯგუფები.

სასწავლო – სააღმზრდელო პროცესი ჩერდება ლანჩხუთის მუნიციპალიტეტის ყველა საჯარო სკოლაში 2 დღით, საბავშვო ბაღებში 3 დღით;

ოზურგეთის მუნიციპალიტეტის ბაღებში სააღმზრდელო პროცესი შეჩერდება 3 დღით, ხოლო სწავლას მხოლოდ ქალაქის სკოლები განაგრძობენ.”