შესაძლოა, შპს ”გურია ექსპრესის” თანამშრომლები კვლავ გაიფიცონ. საუბარია ოზურგეთში მდებარე ე.წ. ”გულისტანის” საწარმოზე, სადაც დასაქმებულებს ხელმძღვანელობასთან სხვადასხვა სახის მოთხოვნა აქვთ. აღნიშნული ინფორმაცია ”ლაბორის” თავმჯდომარემ გიორგი დიასამიძემ გაავრცელა. სწორედ მისი ორგანიზაცია ადვოკატირებს ”გურია ექსპრესის” თანამშრომლებს.
გიორგი დიასამიძის განცხადებით, დასაქმებულები შრომითი პირობების გაუმჯობესებას და ინფგლაციის შესაბამისად ხელფასების ავტომატური ზრდას ითხოვენ, რასთან დაკავშირებითაც ორგანიზაციასთან შეთანხმება შედგა, თუმცა ”გურია ექსპრესმა” ნაკისრი ვალდებულება არ შეასრულა. დიასამიძის ინფორმაციით, შრომის ინსპექციამ ორგანიზაცია უკვე დააჯარიმა მედიაციით გათვალისწინებული შეთანხმების შეუსრულებლობის გამო.
” ორგანიზაცია დასაქმებულებს უქმნიდა სხვადასხვა სახის პრობლემებს, უსამართლოდ უცხადებდა საყვედურს. თანამშრომლებს ემუქრებიან, რომ ქარხანას ქუთაისში გადაიტანენ. ამიტომ დიდი ალბათობით დაიწყება გაფიცვა. საზოგადოებას მოვუწოდებთ მხარდაჭერისკენ, მიუხედავად იმისა, რომ საახალწლოდ შეიძლება ხორბლის ფქვილის დეფიციტი შეიქმნას, მაგრამ საზოგადოება, დარწმუნებული ვარ, გაგვიგებს, რადგან დასაქმებულები არიან მძიმე შრომით პირობებში და ყოველ წამს შეიძლება გაათავისუფლონ. ” – განაცხადა გიორგი დიასამიძემ ”ფეისბუქის” პირდაპირ ეთერში.
შეგახსენებთ, რომ ”გურია ექსპრესის” თანამშრომლები 2021 წელს გაიფიცნენ და მათი პროტესტი 38 დღის მანძილზე მიმდინარეობდა. საბოლოოდ, შეთანხმება შედგა და საწარმომ თანამშრომლებს ხელფასები გაუზარდა, თუმცა დღემდე ვერ მოხერხდა შრომითი პირობების გაუმჯობესება და სხვა სახის პრობლემების აღმოფხვრა. რაც შეეხება ამჟამინდელ მოსალოდნელ გაფიცვას, ამასთან დსაკავშირებით დაზუსტებული ინფორმაცია ცნობილი, სავარაუდოდ, დღის ბოლომდე გახდება.
Loading ...