,,გუგლ არტი“- კარი კულტურისა და ხელოვნების ვირტუალურ სამყაროში

პანდემიამ არაერთ სფეროზე მოახდინა გავლენა, ბევრი რამ დისტანციურ რეჟიმში გადართო, ბევრიც კი საერთოდ დააპაუზა. ჩარჩოებში მოექცა კულტურაც, ჩვენ ვეღარ ვახერხებთ დავესწროთ ხალხმრავალ გამოფენებს, კონცერტებს…ხელოვნება და კულტურა ადამიანისთვის უსაზღვრო სიამოვნების, შემეცნებისა და შთაგონების წყაროა, მისი დეფიციტი კი განწყობასა და სხვა ბევრ რამეზე უარყოფითად აისახება. მიუხედავად ამ მდგომარეობისა, საბედნიეროდ, არსებობს ონლაინ არტ ტურები, რომელთა მეშვეობითაც სხვადასხვა მუზეუმებისა და ნამუშევრების დათვალიერება ასე შორიდან, ონლაინ შეგვიძლია.

,,გუგლ არტმა“ მსოფლიოს მასშტაბით არსებული 2500-ზე მეტი მუზეუმი და გალერეა გააერთიანა, რათა ყველას შესძლებოდა ვირტუალური ტურებით ენახა ცნობილი მუზეუმების ონლაინ ექსპონატები. ასეთია ბრიტანეთის საბჭოს კოლექციაც, რომელიც მსოფლიოში ცნობილი ხელოვანების: ანიშ კაპურის, ჰენრი მურის, ბრიჯიტ რილისა და სხვათა ნამუშევრებს აერთიანებს. აქ თავმოყრილი ნიმუშების დათვალიერება მცირედით მაინც შეგვიქმნის განწყობას და პანდემიის დღეებს უფრო ნაყოფიერს გახდის.

ბრიტანეთის საბჭოს კოლექციაში ამჟამად რამდენიმე ასეთი ტურია. საიტზე შესვლისთანავე გვეკონტაქტება ონლაინ კურატორი, რომელიც ინტერესის სფეროს გვარჩევინებს და შემდგომ ნამუშევრებსაც ამის მიხედვით გვაჩვენებს. ასევე საინტერესოა ციფრული გამოფენა ამავე ბრიტანეთის საბჭოს კოლექციიდან, მისი სახელწოდებაა ,,თითქმის იქ“ ხოლო კურატორები თეონა ბურკიაშვილი, ტატიანა კობუჩინსკა და სეიჰან მუსაოღლუ არიან. ,,თითქმის იქ“ ხელმისაწვდომია ინგლისურ, რუსულ, უკრაინულ, თურქულ და ქართულ ენებზე. ყველა ნიმუში ჩვენგან შორსაა, მათ კილომეტრები გვაშორებს, მაგრამ გამოფენა იმდენად ჰგავს რეალობას, რომ გვიჩნდება განცდა თითქმის იქ ვართ და ახლოდან ვუყურებთ ყველაფერს, შესაბამისად გამოფენა სახელს ნამდვილად ამართლებს. ონლაინ ტურის განმავლობაში  გამოფენილ ნამუშევრებს ვეცნობით და მათ შესახებ სხვადასხვა სახის ინფორმაციას ვიგებთ.

საინტერესოა ამერიკის ხელოვნების ფედერაციის (AFA) ვირტუალური ღონისძიებებიც, მათ გვერდზე არაერთი ონლაინ გამოფენა და ათასობით ნამუშევარია. შეგვიძლია ონლაინ ვესტუმროთ ამსტერდამში არსებულ ვან გოგის მუზეუმსაც, რომელშიც ვინსენტ ვან გოგის უდიდესი კოლექციაა გამოფენილი. ორი ვირტუალური ტური აქვს ვაშინგტონის ეროვნულ გალერეას, ერთში განთავსებულია 1740-1895-იანი წლების ამერიკული მოდის გამოფენა, ხოლო მეორეში ჰოლანდიელი მხატვრის, იოჰანეს ვერმერის ნამუშევრები. ყოველივე ამის ნახვა კი ,,გუგლ არტის“ დახმარებითაა შესაძლებელი.

საბოლოოდ, მიუხედავად იმისა, რომ კულტურა და ხელოვნება პანდემიის ჩარჩოებშია მოქცეული, ,,გუგლ არტის“ მეშვეობით შეგვიძლია მსოფლიოში არსებულ უამრავ გამოფენას ვირტუალურად ვეწვიოთ და პანდემიის დღეებისთვის დადებითი განწყობა შევიქმნათ. 

ავტორი: თამუნა კირკიტაძე