გიორგი ურუშაძე გუბერნატორის პოსტზე გიორგი ღურჯუმელიძემ ჩაანაცვლა

გურიის გუბერნატორის პოზიციაზე გიორგი ურუშაძე გიორგი ღურჯუმელიძემ ჩაანაცვლა. აღნიშნულის შესახებ ცნობილი გუშინ გახდა, მტავრობის ადმინისტრაციაში პრემიერ-მინისტრმა გურიასთან ერთად კიდევ ოთხი რეგიონის ახალი გუბერნატორი წარადგინა.

რაც შეეხება გიორგი ურუშაძეს, როგორც ”ქართულ ოცნებაში” აღნიშნეს, უკვე ყოფილი გუბერნატორები კვლავ მათ გუნდში რჩებიან. თუმცა ჯერჯერობით უცნობია, სად გააგრძელებს საქმიანობას ყოფილი რწმუნებული.

გიორგი ურუშაძემ 2021 წელს სახელმწიფო რწმუნებულის პოსტზე გურიის მხარეში გიორგი სახოკია ჩაანაცვლა. ურუშაძე ამ თანამდებობაზე ირაკლი ღარიბაშვილის პრემიერ-მინისტრობის დროს დაინიშნა. ის მაშინ ლერი ბარნაბიშვილმა წარადგინა, რომელიც იმ დროისთვის გურიაში რეგიონებთან ურთიერთობის დეპარტამენტის უფროსი იყო.

რაც შეეხება გიორგი ღურჯუმელიძეს, ის დღემდე ოზურგეთის მუნიციპალიტეტის მერის პირველი მოადგილის თანამდებობას იკავებდა.

”ქართულ ოცნების” წევრი ის 2012 წლიდანაა. პარტიაში იკავებდა სხვადასხვა თანამდებობრივ პოზიციას. ასევე, იყო ოზურგეთის საკრებულოს თავმჯდომარის მოადგილე.

ღურჯუმელიძის გუბერნატორად დანიშვნამდე საზოგადოებაში იყო საუბრები, რომ შესაძლოა ის ოზურგეთში ”ქართული ოცნების” მერობის კანდიდატი ყოფილიყო. აღნიშნულთან დაკავშირებით ”გურიის ახალ ამბებში” სტუმრობისას გიორგი ღურჯუმელიძემ კონკრეტიკისგან თავი შეიკავა.

გიორგი ღურჯუმელიძე აღარ, მაგრამ ვინ იქნება ”ქართული ოცნების” კანდიდატი ოზურგეთის მუნიციპალიტეტის მერის პოსტზე ჯერჯერობით ისევ უცნობია.