![](https://guria.tv/wp-content/uploads/2022/11/germania.jpg)
გერმანიის პარლამენტმა დაამტკიცა კანონი, რომელიც გერმანიის მოქალაქეობის მიღების გამარტივებას ითვალისწინებს. შესაბამის ინიციატივას ბუნდესტაგის ქვედა პალატაში 382-მა დეპუტატმა მისცა ხმა, 234 წინააღმდეგი იყო, 23-მა კი თავი შეიკავა.
გერმანიის მთავრობა იმედოვნებს, რომ ახალი წესები ქვეყანაში საზღვარგარეთიდან კვალიფიციური მუშახელის მოზიდვას შეუწყობს ხელს და სხვადასხვა სფეროში კადრების დეფიციტს აღმოფხვრის.
კანონის მიხედვით, მარტივდება უცხოელთა ნატურალიზაციაც. ახალი შესწორებებით, გერმანიის მოქალაქეობის მისაღებად საჭირო იქნება ქვეყანაში ხუთი წლის განმავლობაში ცხოვრება, რვის ნაცვლად. ინტეგრაციაში განსაკუთრებული წარმატებების შემთხვევაში (მაგალითად, გერმანული ენის კარგი ცოდნა, მოხალისეობრივ საქმიანობაში მონაწილეობა ან მაღალი კვალიფიკაცია) სამი წელიც საკმარისი იქნება. ასევე დასაშვები იქნება ორმაგი მოქალაქეობის ქონა, აქამდე ეს წესი მხოლოდ ევროკავშირის სხვა ქვეყნებისა და შვეიცარიის მოქალაქეებზე ვრცელდებოდა.
„ჩვენ ფეხი უნდა ავუწყოთ რბოლას კვალიფიციური კადრების მოსაზიდად. ეს ნიშნავს, რომ ჩვენ კვალიფიციურ ხალხს მთელი მსოფლიოდან უნდა გავუკეთოთ შეთავაზება, როგორც ამას აშშ და კანადა აკეთებენ. გერმანიის მოქალაქეობა არის ამ შეთავაზების ნაწილი“, – განაცხადა გერმანიის შინაგან საქმეთა მინისტრმა, ნენსი ფეიზერმა.
ამის ფონზე, მთავრობის ინიციატივით, მოქალაქეობის მიღება უფრო რთული უნდა გახდეს ისეთი პირებისთვის, ვინც არ უჭერს მხარს გერმანიის თავისუფალ, დემოკრატიული წესრიგს.
ახალ ცვლილებებს ეწინააღმდეგება კონსერვატიული ოპოზიცია, რომელიც მკაცრი საიმიგრაციო პოლიტიკის გატარებას ითხოვს.
ამის პარალელურად, მთავრობა უკანონო იმიგრაციის წინააღმდეგ ზომებს ამკაცრებს, რომელთა შორისაა იმ მიგრანტების დეპორტაციის დაჩქარება, რომლებსაც თავშესაფარზე უარი ეთქვათ.