"გელათს არ უნდა შეეხოს ნებისმიერი ხელოსანი, რომელმაც გუშინ სამზარეულო გაარემონტა" – წულუკიანი

კულტურის, სპორტის და ახალგაზრდობის სამინისტრო კულტურის კოდექსის შექმნას აანონსებს. როგორც მოქმედმა მინისტრმა, თეა წულუკიანმა „ქალების ნარატივში“ სტუმრობისას განაცხადა, სხვადასხვა მიმართულებით არის მიმოფანტული კანონები, რომელთაც ხშირად კანონის ფორმაც კი არ აქვს და დარგი მინისტრის ხასიათის მიხედვით იმართება.

როგორც წულუკიანი ამბობს, უნდა შეიქმნას კოდექსი, სადაც თითოეულ დარგს ცალკე თავი მიეძღვნება, მათ შორის იქნება თეატრების, მუზეუმების, კინოხელოვნების, სახვითი ხელოვნების და მრავალი სხვა თავი.

მინისტრი მიიჩნევს, რომ კოდექსი დაარეგულირებს თამაშის წესებს სახელმწიფოსა და თუნდაც, პოტენციურ სპონსორებს შორის.

ერთ-ერთ მნიშვნელოვან საკითხად კულტურის მინისტრი ქვეყანაში არსებული ძეგლების რესტავრაცია-რეაბილიტაციის საკითხს მიიჩნევს, რომლებიც მისი შეფასებით „პრაქტიკულად, მოშლილია“.

„ჩვენ ვართ ეროვნული კატასტროფის მოწმე გელათის სამონასტრო კომპლექსში, სწორედ იმიტომ, რომ არ არსებობს წესები, კანონი. ის მწირი ნორმები, რაც შემოიღო პარლამენტმა მრავალი წლის წინ, შეჩერებულია. ისინი არ მოქმედებს. ისეთ მნიშვნელოვან ძეგლს, როგორიც გელათია და ასევე სხვა ძეგლებს, რომლებზეც დგას ჩვენი ეროვნული იდენტობა, შეიძლება შეეხოს ნებისმიერი ხელოსანი, რომელმაც, მაგალითად, თქვენ გუშინ სამზარეულო გაგირემონტათ. არ მინდა იფიქროთ, რომ ვაჭარბებ ან ხატოვნად გამოვხატავ. ეს კატასტროფაა. ამ კოდექსმა ეს საკითხებიც უნდა დაარეგულიროს, რომ ძეგლებს შეეხონ მხოლოდ ისინი, ვინც იცის ქვასთან მუშაობა, არის ფერწერის სპეციალისტი და არა უბრალოდ ხელოსანი, რომელიც თანამედროვე შენობებს შეიძლება ძალიან კარგად აშენებს“, – ამბობს წულუკიანი.