გაუვიდა თუ არა ქვეყანაში არსებულ „ფაიზერის“ ვაქცინას ვადა – გამყრელიძის პასუხი

„ფაიზერი“ გავიკეთე ხალხის დასარწმუნებლად, ბევრი მოარული ჭორია სოციალურ მედიაში, რომ ქვეყანაში არსებულ „ფაიზერს“ ვადა გაუვიდა, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ რესპუბლიკურ საავადმყოფოში ჟურნალისტებს განუცხადა, სადაც ის „ფაიზერის“ ვაქცინის ე.წ. ბუსტერ დოზით აიცრა.

მისი თქმით, „ფაიზერის“ ვაქცინას მისი გამოშვებიდან ვადა აქვს ცხრა თვის განმავლობაში.

„სპეციალურად გავიკეთე „ფაიზერი“, რადგან ხალხი დავაწმუნო, ბევრი მოარული ჭორია სოციალურ მედიაში, რომ ქვეყანაში არსებულ ფაიზერს ვადა გაუვიდა და ასე შემდეგ. მინდა, განვაცხადო, ზოგადად აგვისტოს შემდეგ, აგვისტოში იყო ეს დადგენილება „ფაიზერისა“ და ამერიკის საკვებისა და წამლის ადმინისტრაციის, რომ „ფაიზერი“, რომელიც წლის პირველ ნახევარში ადმინისტრირდებოდა, დაშვებული იყო „ფაიზერის“ ექვსთვიანი ვადა. ასევე იცით, რომ „ფაიზერი“ ინახება -60-დან -90 გრადუს ტემპერატურაზე. გამოლღობის შემდეგ იყო, რომ ხუთ დღეში უნდა გამოგეყენებინა ჩვეულებრივ ტემპერატურაზე. აგვისტოში შეცვალეს რეკომენდაციები და შესაბამისად, „ფაიზერს“ ვადა აქვს უკვე ცხრა თვე მისი გამოშვებიდან, თუ ინახება -60-დან -90 გრადუს ტემპერატურაზე. გამოლღობის შემდეგ შეგიძლიათ, გამოიყენოთ 30 დღის განმავლობაში, ჩვეულებრივ მაცივრის ტემპერატურაში, 2-დან 8 გრადუსამდე“, – განაცხადა ამირან გამყრელიძემ.