რეგიონში მიმდინარე ომის და თურქეთში ლირის მკვეთრი გაუფასურების გამო, თხილის ბაზარზე ფასები მკვეთრად დაეცა – ამის შესახებ „ბიზნესპრესნიუსს“ თხილის მწარმოებელთა ასოციაციის ხელმძღვანელმა განუცხადა.
გიორგი თოდუა ამბობს, რომ ფერმერებს რეალიზაციისთვის მხოლოდ საერთო მოსავლის 10-15% აქვთ დარჩენილი.
„რეგიონში საომარი მოქმედებების გამო, ლოჯისტიკა რა თქმა უნდა, გაძვირებულია, თუმცა რაც შეეხება რეალიზაციას, ფერმერებს მხოლოდ 10-15% აქვთ დარჩენილი. რაც შეეხება ფასს, გასულ წელთან შედარებით თხილი 2-3 ლარით ნაკლები ღირს. დღეს ერთი კილოგრამი თხილის ფასი დაახლოებით 4-5 ლარია, მაშინ როცა შარშან ამ დროს იგივე ხარისხის 7-8 ლარი ღირდა.
რეგიონში მიმდინარე ომის და თურქეთში ლირის მკვეთრი გაუფასურების გამო, ასევე პანდემიის გამო მოთხოვნა იყო ნაკლები და ამ ყველაფერმა ერთად, გამოიწვია შედეგი, რომელიც დღეს გვაქვს. გასული წლების გამოცდილებით მაისის ბოლომდე მთავრდება ხოლმე რეალიზაციის პროცესები“, – განაცხადა თოდუამ.
თხილის მწარმოებელთა ასოციაციის ხელმძღვანელი ამბობს, რომ მიზანი ყველა ფერმერისთვის უნდა იყოს პრემიუმ ხარისხის თხილის წარმოება, რომელზე ფასი და მოთხოვნაც ყოველთვის მაღალია.
„2-3 თვეში ახალი სეზონი გვეწყება რომლისთვისაც ვემზადებით. მიმდინარეობს შეწამვლა და ა.შ. ჩვენ ორიენტირებული უნდა ვიყოთ პრემიუმ ხარისხის თხილის წარმოებაზე, რომლის ფასი 9 ლარი და მეტიც იყო. ჩვენი მიზანი ეს არის, რომ ვაწარმოოთ ამ სტანდარტის პროდუქცია, რაც სრულიად მიღწევადია. ამიტომ არსებობს ასოციაციაც. რაც არ უნდა პრობლემები იყოს, პრემიუმ ხარისხის თხილზე მოთხოვნა სულ იქნება და ყოველთვის იქნება მაღალი ფასი. ამისათვის აუცილებელია, მთელი რიგი ღირებულებათა ჯაჭვი, რომელსაც ჩვენ ვთავაზობთ ჩვენს ფერმერებს. გასულ სეზონზე, თუ საშუალო ფასი იყო 5-6 ლარი, პრემიუმ ხარისხზე 9 ლარი და მეტი იყო ფასი. წამლობა და სასუქის შეტანა, აგრო ვადებში მოსავლის დაბინავება და გაფცქვნა, საშრობებში თხილის გაშრობა, არის აუცილებელი პირობები, რითიც მიიღწევა ხარისხი, რომელსაც უკუგებაც აქვს და ფერმერი იღებს შესაბამის ანაზღაურებას. დღეს, ბაზარზე პრემიუმ ხარისხის თხილი სამწუხაროდ, არ აღემატება 5%-ს“, – განუცხადა თოდუამ ,,ბიზნესპრესნიუსს“.
Loading ...
