როგორი ამინდი იქნება საქართველოში კალანდას – გარემოს ეროვნული სააგენტო მოსახლეობას აფრთხილებს

გარემოს ეროვნული სააგენტოს ინფორმაციით, 13 იანვარს საქართველოში მოსალოდნელია დროგამოშვებით ნალექი, ზოგან ძლიერი, მთაში თოვლის სახით.

მათივე ცნობით, 14 იანვარს ქვეყნის უმეტეს ტერიტორიაზე მოსალოდნელია თოვა, ზოგან ძლიერი, დასავლეთის ძლიერი ქარი, ზღვაზე 4-5-ბალიანი შტორმი.

„მთიან რაიონებში მოსალოდნელია ნისლი, ქარბუქი, ელექტროგადამცემ ხაზებზე შემოყინულობა, გზებზე ლიპყინული და ზვავსაშიშროება.

დიდთოვლობის, ქარბუქის, ხილვადობის გაუარესების, ლიპყინულის და ზვავსაშიშროების გამო საავტომობილო გზების ცალკეულ მონაკვეთებზე შესაძლებელია შეიზღუდოს ტრანსპორტის მოძრაობა. მოსალოდნელმა ნალექებმა შესაძლებელია დასავლეთ საქართველოს მდინარეებზე წყლის დონეების მატება, ხოლო გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო)-აღნიშნულია ინფორმაციაში.

დღეს ამინდი საქართველოში განპირობებული იქნება შავი ზღვის ჩრდილო-დასავლეთიდან შემომავალი ცივი და ნოტიო ჰაერის მასებით.

საქართველოში მოსალოდნელია: დროგამოშვებით ღრუბლიანობის მომატება. საქართველოს უმეტეს რაიონში ნალექი, მთაში თოვლის სახით, ზოგან შესაძლებელია ძლიერი, მაღალ მთაში ქარბუქი. იქროლებს დასავლეთის მიმართულების ძლიერი ქარი.

დასავლეთ საქართველოში – ღრუბლიანი ამინდი. ნალექი, მთაში თოვლის სახით, დღისით ზოგან ძლიერი, მაღალ მთაში ქარბუქი. ღამით ცვალებადი, დღისით დასავლეთის მიმართულების ქარი 10-15მ/წმ, ზოგან ძლიერი 17-22მ/წმ. ჰაერის ტემპერატურა: დაბლობში ღამით +1, +6°, დღისით +2, +7°; მთაში ღამით 0, +5°, დღისით +1, +6°; მაღალ მთაში ღამით -5, 0°, დღისით -3, +2°.

აღმოსავლეთ საქართველოში – დროგამოშვებით ღრუბლიანობის მომატება. ღამით ზოგიერთ, დღის მეორე ნახევრიდან უმეტეს რაიონში ნალექი, მთაში თოვლის სახით, მაღალმთაში ზოგან ძლიერი და ქარბუქი. დღისით დასავლეთის ქარი 10-15მ/წმ, დღის მეორე ნახევრიდან ზოგან ძლიერი 20-25მ/წმ, საღამოს საათებში დროგამოშვებით 28მ/წმ-მდე. ჰაერის ტემპერატურა: ბარში ღამით -1, +4°, დღისით +7, +12°; მთაში ღამით -3, +2°, დღისით 0, +5°, მაღალ მთაში ღამით -5, 0°, დღისით -3, +2°.

თბილისში – დროგამოშვებით ღრუბლიანობის მომატება. დღის მე-2 ნახ-დან წვიმა. ჩრდილო-დასავლეთის ქარი 10-15მ/წმ, დღის ბოლოს 20-25მ/წმ, საღამოს საათებში შესაძლებელია 28მ/წმ-მდე. ჰაერის ტემპერატურა: დღისით +9°, ღამით 0°.