განმეორებითი ტექდათვალიერება ფასიანი ხდება

განმეორებითი ტექინსპექტირება ფასიანი ხდება. შესაბამისი დადგენილება მთავრობამ უკვე დაამტკიცა.

დადგენილება ძალაში 2023 წლის 1 თებერვლიდან შევა. ახალი წესის თანახმად, 8-ზე მეტი დასაჯდომი ადგილის მქონე ავტოსატრანსპორტო საშუალებებისა და 3500 კგ-ზე მეტი სრული მასის მქონე, ტვირთის გადასაზიდად განკუთვნილი ძრავიანი ავტოსატრანსპორტო საშუალებებისთვის ტექინსპექტირება 100 ლარი, განმეორებითი ინსპექტირება 30 ლარი ეღირება. დანარჩენ შემთხვევებზე პირველადი ინსპექტირების საფასური 60 ლარია, განმეორებითის 20 ლარი.

რაც შეეხება M1 კატეგორიის ელექტრომობილებს,  მათი პერიოდული ტექნიკური ინსპექტირების საფასური 48 ლარით, ხოლო განმეორებითი ინსპექტირების საფასური 15 ლარით განისაზღვრება.

ტექინსპექტირების ტარიფი სახელმწიფოს მიერაა დადგენილი და ტექინსპექტირების ყველა ცენტრში იდენტურია.

ინსპექტირების ცენტრების წარმომადგენლების  ცნობით,  ქვეყანაში რეგისტრირებული მილიონნახევარი ავტოსატრანსპორტო საშუალების მხოლოდ 48%-მდე აკმაყოფილებს ტექდათვალიერების მოთხოვნებს.