”გამგებლის დედა ვარ და ამას კი არ უნდა ვამბობდე” – რას აცხადებენ გრიგოლ კოსტავას ოჯახში

ოზურგეთის მუნიციპალიტეტის სოფელ მერიაში მერის წარმომადგენელი გრიგოლ კოსტავა დააკავეს.

დაკავებულს ბრალად ქრთამის აღება ედება.

ანტიკორუფციული სააგენტოს მიერ გავრცელებული ინფორმაციით, კოსტავამ, რომელიც ამ თანამდებობას 2018 წლიდან იკავებს, მოქალაქეს 10 კბ.მეტრი სამერქნე მასალის ადგილწარმოშობის ყალბი საბუთის სანაცვლოდ ხუთასი ლარი გამოართვა.

კოსტავას ოჯახში ამბობენ, რომ არანაირ ინფორმაციას არ ფლობენ. დაკავების ფაქტი მათთვის სრულიად მოულოდნელი იყო და ქრთამის აღებასთან დაკავშირებული ბრალდება წარმოუდგენელი.

რაც ჩემს შვილს ბრალდება წაუყენეს, ის თანხა ჩვენთან არ მოსულა, ჩვენ სამი პატარა ბავშვი გვყავს, მოდით, ნახეთ, ავად არიან, სიცხე აქვთ, ჯერ ღუმელიც არ დაგვიდგამს. ამას კი არ უნდა ვამბობდე, გამგებლის დედა ვარ, მაგრამ არ იყო ეს პიროვნება ფულზე დახარბებული, ის იყო ხალხისთვის, იბრძოდა ხალხისთვის და ამის გამო სოფელში უყვარდათ. არაფერი ვიცი, რა მოხდა, სახლში უნდა მოსულიყო, ბავშვები ექიმთან უნდა წაგვეყვანა, რომ არ მოვიდა და ტელეფონიც გამორთული ჰქონდა, მერიაში ჩავედი და რომ ვერ ვნახე, სახლში დავბრუნდი. მერე გავიგე გრიგოლი დააკავესო” – ამბობს კოსტავას დედა, რიმა ზურაბიანი.

აღნიშნული ფაქტით გაკვირვებულები არიან სოფელ მერიის გამგეობაში. კოსტავას საკუთარი თანამშრომლები დადებით და პასუხისმგებლიან ადამიანად ახასიათებენ და მომხდარის შეფასება უჭირთ.

”კეთილშობილი პიროვნება, ყველასთვის რაღაცის გაკეთებას ცდილობდა, დახმარებას ცდილობდა, სამი პატარა შვილი ჰყავს, ღამით არ მიძინია ნერვიულობისგან” – ოზურგეთის მერის წარმომადგენლის თანაშემწე ნანული ხურციძე.

რაც შეეხება ოზურგეთის მუნიციპალიტეტის მერიას, გამოძიების ინტერესებიდან გამომდინარე აღმასრულებელ ორგანოში კომენტარისგან თავი შეიკავეს.