გაიცა თუ არა მერიაში სახელფასო დანამატები

დღეს საზოგადოების ინტერესი ოზურგეთის მუნიციპალიტეტის მერიაში სახელფასო დანამატების შესაძლო გაცემის საკითხს მოჰყვა. გავრცელდა ინფორმაცია, რომ მერიაში სახელფასო დანამატები გაიცა.აღნიშნულ გადაწყვეტილებას ოზურგეთის საკრებულოს თავმჯდომარე სპეციალური განცხადებით გამოეხმაურა და აღნიშნა, რომ მერის მიერ დანამატების გაცემას მიზანშეუწონლად მიიჩნევს. “ეს მერის ექსკლუზიური უფლებაა და ჩვენთან მას ეს საკითხი არ განუხილავს. მოგეხსენებათ, ოზურგეთის მუნიციპალიტეტის მერი” ქართული ოცნების “გუნდის წევრი არ არის, მან კენჭი დამოუკიდებელ კანდიდატად იყარა” – განაცხადა დავით დარჩიამ. ოზურგეთის მუნიციპალიტეტის მერიაში კომენტარს არ აკეთებენ, თუმცა პირად საუბარში ამბობენ, რომ ეს ინფორმაცია სიცრუეა. მერის მოადგილის ირაკლი სირაძის თქმით, ამირან გამყრელიძის უწყებიდან წერილი 2020 წლის 18 მარტს მიიღო, სადაც აღნიშნული იყო, რომ საზოგადოებრივი ჯანდაცვის ცენტრის თანამშრომლების ხელფასებისთვის გადაეხედათ. შესაბამისად, საზოგადოებრივი ჯანდაცვის ცენტრის 18 თანამშრომელზე გაიცა სახელფასო დანამატი, რამაც ჯამში 7250 ლარი შეადგინა. მათ შორის იყო მერის მოადგილის ირაკლი სირაძის 100 %იანი დანამატი, რომელიც, როგორც თვითონ ამბობს, ჯანდაცვის მიმართულების კურატორობისთვის აიღო. 

“საზოგადოებრივი ჯანდაცვის ცენტრის თანამშრომლები 24 საათიან რეჟიმში მუშაობენ. მე ამ მიმართულების კურატორი ვარ და აბსოლუტურად ბოლომდე ვარ ჩართული მათ საქმიანობაში. შესაბამისად, მერმა ჩემთან დაკავშირებით დანამატის საკითხი ამიტომაც გადაწყვიტა” – აღნიშნა ირაკლი სირაძემ.

რაც შეეხება, მერიის სხვა თანამშრომლებს, მათთან დაკავშირებით გამოცემული იყო მხოლოდ ბრძანება, მაგრამ ქვეყანაში შექმნილი ვითარებიდან გამომდინარე, არცერთ მათგანს დანამატი არ ჩარიცხვია.