გაიზრდება თუ არა საქალაქთაშორისო მგზავრობის საფასური რეფორმის შემდეგ

სავალდებულო ნებართვა მგზავრთა გადაყვანაზე, შეზღუდვა ე.წ „მარშუტკებით“ მგზავრთგადაყვანაზე, საგზაო ინსპექტირება, ავტოსადგურების სავალდებულო სერტიფიცირება – ეს იმ ცვლილებების მცირე ჩამონათვალია, რომელიც მგზავრთგადაყვანისა და სადგურების რეფორმების ფარგლებში 1-ლი მარტიდან და 1-ლი ივნისიდან ეტაპობრივად ამოქმედდება.

საქალაქთაშორისო გადაყვანებთან დაკავშირებით რამდენიმე ახალი რეგლამენტი 2024 წლის განმავლობაში დამტკიცდა. ამ რეგლამენტებს შორის არის ავტოსადგურების მოწესრიგების ვალდებულებაც, რომელიც პროცესიც ზოგიერთ სადგურში უკვე დაწყებულია და ეს პროცესი 2025 წელს უნდა დასრულდეს. კერძოდ, ავტოსადგურები აღჭურვილი უნდა იყოს მძღოლის მოსასვენებელი სივრცით, სამედიცინო პუნქტით, საპირფარეშოებით, მგზავრების მოსაცდელი სივრცით, ბაქნებითა და ა.შ. მოთხოვნები ყველა სადგურისთვის მისი ზომისა და ტიპის მიხედვით ინდივიდუალურად არის ფორმულირებული.

ცვლილებების თანახმად, 2025 წლის 1-ლი მარტიდან რეისში ვერ გავა ვერც ერთი მძღოლი, რომელსაც სულ მცირე წელიწადში ერთხელ არ აქვს გავლილი სამედიცინო შემოწმება; ასევე, საავტომობილო სამგზავრო გადაყვანას არ განახორციელებს პირი, რომელსაც არ გააჩნია საავტომობილო სამგზავრო გადაყვანის ნებართვა.

უკვე 1-ლი ივნისიდან ავტოსადგურების სერტიფიცირება სავალდებულო ხდება. სერტიფიცირების ფასი სადგურის კატეგორიის მიხედვით 1000-ლარიდან 10 000-ლარის ფარგლებში მერყეობს. სერტიფიკატი გაიცემა 5 წლის ვადით.

ასევე, ამავე პერიოდიდან გარკვეულ ავტომობილებს სიჩქარის შემზღუდველი მოწყობილობის გამოყენებაზე შეამოწმებენ. აღსანიშნავია ისიც, რომ 1-ელი ივნისიდან 150 კმ-ის მანძილით დაშორებულ პუნქტებს შორის მგზვართგადაყვანებს მხოლოდ ავტობუსები განახორციელებს.

„ბიზნესპრესნიუსი“ დაინტერესდა, დაგეგმილი ცვლილებები ხომ არ გამოიწვევს სამგზავრო ტარიფების ზრდას. როგორც ჩვენთან საუბრისას დიდუბის ავტოსადგურის ხელმძღვანელი ნესტორ მიქატაძე აღნიშნავს, საფასური მხოლოდ იმ შემთხვევაში გაიზრდება, თუ ამაზე ქვეყნის მასშტაბით ყველა სადგური შეთანხმდება.

„ჩვენ ვაწარმოებთ მომსახურებას, მგზავრთგადამყვანები არიან სხვა კომპანიები. ჩვენ ვაწარმოებთ მგზავრთგადამყვანების მომსახურებას. თუ მგზავრთგადამყვანი კომპანიები ან კერძო პირები მოითხოვენ ფასების გაზრდას, რა თქმა უნდა, ჩვენს გარეშე ამას ვერ გააკეთებენ, რადგან ჩვენ ვყიდით მათზე ბილეთს და ჩვენთან შეთანხმებით უნდა მოხდეს ეს პროცესი. თუ ამას ექნება მასშტაბური სახე მთელი ქვეყნის მასშტაბით, ყველგან მოიმატებს ფასები – წინააღმდეგ შემთხვევაში, ამხელა კონკურენციის პირობებში ჩვენ არ ვგეგმავთ და ჩვენს ინტერესში არ შედის მგზავრობის საფასურის გაზრდა“, – განაცხადა ნესტორ მიქატაძემ.

bpn.ge