ცენტრალური გათბობის სისტემა 2023 წელს გათბობის საუკეთესო მეთოდად მიიჩნევა, რასაც სისტემის კომფორტულობა, უსაფრთხოება და ეფექტურობა განაპირობებს. ამის გამო, უფრო და უფრო მეტი ოჯახი ამონტაჟებს სახლში ცენტრალურ გათბობას.
მიუხედავად იმისა, რომ ცენტრალური გათბობა – გათბობის ყველაზე კომფორტული გზაა, უნდა გავითვალისწინოთ ის გავრცელებული პრობლემები, რომლებიც სისტემას დროთა განმავლობაში შეიძლება შეექმნას. ამ ხარვეზების აღმოფხვრას სწრაფად და მარტივად შეძლებთ, თუ მათ მომზადებული დახვდებით.
არასაკმარისი სითბო
გათბობის სისტემებთან დაკავშირებული ყველაზე გავრცელებული პრობლემა არასაკმარისი სითბოა. მართალია, ამ ტიპის პრობლემა ხშირია, თუმცა მისი მოგვარება მარტივად შეგიძლიათ. ამისთვის პირველ რიგში თერმოსტატი შეამოწმეთ და დარწმუნდით, რომ სასურველ ტემპერატურაზე გაქვთ დაყენებული.
თუ აღმოჩნდა, რომ თერმოსტატი გამართულად მუშაობს და ტემპერატურაც სასურველ მაჩვენებელზეა, გათბობის ქვაბისა და შეცდომის კოდების შემოწმებაზე გადადით.
თუ გათბობის ქვაბიც უპრობლემოდ მუშაობს, მაშინ, დიდი ალბათობით, პრობლემას სისტემაში არსებული წყლის დაბალი დონე იწვევს. წყლის დონის გაზრდით ტემპერატურაც სწრაფად აიწევს. დამატებით, უნდა იცოდეთ ისიც, რომ დაბალ ტემპერატურას რადიატორებში აკუმულირებული ჰაერიც იწვევს, რაც სითბოს გარეთ გამოსვლას აფერხებს. რადიატორიდან ჰაერის გამოდევნა ხელს უწყობს ცხელი წყლის თავისუფლად ცირკულაციას გათბობის სისტემაში, ზრდის ეფექტურობას და სახლში სითბოს თანაბრად განაწილებას უზრუნველყოფს.
სითბოს არათანაბარი გადანაწილება
წინას მსგავსად, სითბოს არათანაბარი განაწილებაც ბევრი ოჯახის პრობლემაა. ზოგიერთი ოთახი სხვებზე ცივი შეიძლება იყოს. ამის გამოსწორების პირველი და ყველაზე მარტივი გზა ზევით უკვე განვიხილეთ: გამოათავისუფლეთ ჰაერი რადიატორებიდან, რაც ცხელი წყლის ცირკულაციას შეუწყობს ხელს. შეიძლება ზოგიერთი ოთახში იმიტომაც იყოს დანარჩენებთან შედარებით დაბალი ტემპერატურა, რომ რადიატორს ავეჯი ან ფარდები ეფარება. ასეთ დროს სითბოსთვის ფიზიკური დაბრკოლება იქმნება და, შესაბამისად, შორს ვერ აღწევს.
გათბობის ქვაბი ხშირად ითიშება
გათბობის ქვაბის ხშირი გათიშვა ფიზიკურ დისკომფორტთან ერთად, ხასიათზეც მოქმედებს. თუ ამჩნევთ, რომ ქვაბი ხშირად ითიშება, პირველ რიგში წნევის მრიცხველი შეამოწმეთ და დარწმუნდით, რომ წნევა დაბლა არ არის დაწეული. დაბალი წნევა პირდაპირ იწვევს ქვაბის გათიშვას. ასეთ დროს საჭიროა, შესაბამის სპეციალისტს დაუკავშირდეთ და მისი მითითებებით აწიოთ წნევის დონე ან გამოიძახოთ ხელოსანი სახლში და პრობლემის მოგვარება მას მიანდოთ.
იმ შემთხვევაში, თუ წნევის დონე ნორმის ფარგლებშია, მაგრამ ქვაბი მაინც ითიშება, შეიძლება პრობლემა თერმოსტატი, გაუმართავი ტუმბო ან ჩაკეტილი კონდენსატის მილი იყოს. მსგავსი ხარვეზის მოგვარება გამოუცდელი ადამიანისთვის არ არის მარტივი, ამიტომ ასეთ შემთხვევაში აუცილებლად უნდა მიმართოთ კომპეტენტურ ტექნიკოსს.
ხმაური
ზოგჯერ ცენტრალური გათბობის სისტემები ხმაურით მუშაობს. ასეთ დროს დარტყმისა და გუგუნის მსგავსი ხმები უფრო მნიშვნელოვან პრობლემაზე, კერძოდ, სისტემაში ჰაერის ჩაკეტვაზე მიუთითებს, რაც, როგორც უკვე გავიგეთ, სითბოს გამოყოფას პირდაპირ უშლის ხელს. ამ პრობლემას ისევ და ისევ რადიატორების გაწმენდა და ჩაკეტილი ჰაერის გამოთავისუფლება მოაგვარებს. ჰაერის გამოტუმბვის შემდეგ სისტემა თუ ისევ ხმაურიანად მუშაობს, შეიძლება პრობლემას გაუმართავი ტუმბო, ქვაბებში კირის დაგროვება ან მოშვებული მილები ქმნიდეს.
წინა მაგალითის მსგავსად, ამ ხარვეზის მოგვარებაც სჯობს გამოცდილ პროფესიონალს მიანდოთ.
თერმოსტატის ხარვეზები
თუ თერმოსტატი გაუმართავად მუშაობის, მოწყობილობა არასწორ ტემპერატურას აჩვენებს, რაც თავისთავად ქმნის დისკომფორტს და ბევრად ართულებს სითბოს რეგულირებას. თუ მსგავს პრობლემას შეხვდებით, პირველ რიგში ბატარეა შეამოწმეთ, რადგან უმთავრესი მიზეზი სწორედ დამჯდარი ბატარეა შეიძლება იყოს. ამის შემდეგ შეამოწმეთ, ხომ არ აქვს თერმოსტატს რაიმე ფიზიკური წინაღობა, რაც ტემპერატურის მაჩვენებელზე მოქმედებს, მაგალითად, ავეჯი ან ფარდები, რომლებიც მოწყობილობას ეფარება.
თუ ყველა ამ ნაბიჯის შემდეგ თერმოსტატი მაინც არასწორ ტემპერატურას აჩვენებს, სავარაუდოდ, მისი გამოცვლა მოგიწევთ, რაზეც ხელოსანი დაგაკვალიანებთ.
ქვაბის წნევის ვარდნა
ქვაბის წნევის ვარდნას ხშირად იწვევს გაჟონვა გათბობის სისტემაში. თავდაპირველად, შეამოწმეთ მილები, სარქველები, რადიატორები და ყურადღებით დააკვირდით, გაოიკვეთება თუ არა რაიმე ნიშანი, რაც პრობლემისკენ მიუთითებს. თუ რომელიმე წერტილში დაგუბებულ წყალს ან თუნდაც პატარა ზომის ლაქებს შეამჩნევთ, დროულად მიმართეთ ხელოსანს, მით უმეტეს, თუ საქმე ფარულ გაჟონვასთან გაქვთ.
სისტემის არაეფექტურობა
დროსთან ერთად შეიძლება შეამჩნიოთ, რომ თქვენი გათბობის სისტემა ისე ეფექტურად აღარ მუშაობს, როგორც თავიდან. ეფექტურობის კლება სავსებით ბუნებრივი, თუმცა არაკომფორტული და თანაც ხარჯიანი მოვლენაა. როგორც წესი, პრობლემის მოსაგვარებლად ქვაბის რეგულარული გაწმენდა, ფილტრების შემოწება და შეცვლა არის საკმარისი.
შეჯამება
ცენტრალური გათბობის სისტემა გათბობის საუკეთესო საშუალებად მიიჩნევა, თუმცა, როგორც ვნახეთ, დროთა განმავლობაში შეიძლება გარკვეულმა პრობლემებმა იჩინოს თავი. თუ ზემოთ ჩამოთვლილ ხარვეზებს მომზადებული დახვდებით და დროულად გამოასწორებთ, თქვენი სისტემა კიდევ მრავალი წლის განმავლობაში შეძლებს ეფექტურად მუშაობას.
Loading ...