გადაიდება თუ არა ეპიდ სიტუაციის გამო ადგილობრივი არჩევნები

უწყებათაშორის საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, ცენტრალურ საარჩევნო კომისიასთან მიმდინარეობს ინტენსიური მუშაობა, რათა 2 ოქტომბერს დაგეგმილი არჩევნები მაქსიმალურად უსაფრთხოდ გაიმართოს.

„ძალიან ინტენსიური სამუშაოები მიმდინარეობს ცენტრალურ საარჩევნო კომისიასთან, რათა დაგეგმილი არჩევნები ეპიდემიოლოგიური თვალსაზრისით მაქსიმალურად უსაფრთხოდ გაიმართოს. მიმდინარეობს მუშაობა პროტოკოლებზე, მათ შორის დამკვირვებლების ჩამოსვლის პროტოკოლებზე და დარწმუნებული ვარ, ყველაფერი დაიგეგმება ისე, რომ მომავალმა არჩევნებმა რაც შეიძლება უსაფრთხოდ ჩაიაროს“, – აღნიშნა გიორგი ღიბრაძემ.

ცენტრალური საარჩევნო კომისიის თავმჯდომარის, გიორგი კალანდარიშვილის განცხადებით საარჩევნო ადმინისტრაციის მხრიდან, დღეის მდგომარეობით, არ დგას ის საკითხი და მოთხოვნა, რომ არჩევნების გარკვეული ეტაპით გადადება უნდა მოხდეს.

„აღსანიშნავია, რომ ის დადგენილებები, რომელიც ჩვენ გუშინდელ სხდომაზე მივიღეთ, ემსახურება იმას, რომ კენჭისყრის დღემდე და ასევე კენჭისყრის დღეს მივიდეთ იმ სამზადისით და სამართლებრივი ბაზით, რომელიც უზრუნველყოფს ერთის მხრივ კორონავირუსის გავრცელების პრევენციას და არჩევნებისას შრომის უსაფრთხო გარემოში ამ სერვისის შეთავაზებას. ეს არის ჩვენთვის უპირობოდ მნიშვნელოვანი. ამ მიზნით, ჩვენ ვახორციელებთ არაერთ ღონისძიებას, როგორიცაა სწრაფი ტესტირება ცესკო-ს, საუბნო და საოლქო საარჩევნო კომისიის წევრების – 63 ათასი ადამიანი გაივლის ტრენინგის წინ სწრაფ ტესტირებას და ეს უზრუნველყოფს პრევენციას, რომ არ მოხდეს ინფიცირებული პირის ამ ტრენინგზე დასწრება. ამასთანავე, ჩვენ მიღებული სამართლებრივი აქტებით უზრუნველვყოფთ იმას, რომ მოვაწესრიგოთ ყველა ის სანიტარულ/ჰიგიენური პროცედურები, რომელიც მნიშვნელოვანია იმისთვის, რომ უსაფრთხო საარჩევნო გარემო შეიქმნას, განსაკუთრებით, კენჭისყრის დღეს და ამომრჩეველს არ ჰქონდეს განცდა, რომ იქ შესაძლოა, მოხდეს ან ვირუსის გავრცელება ან ა.შ“, – განაცხადა კალანდარიშვილმა.

მისივე თქმით, გასული წლიდან გამომდინარე, ცესკო-ს პანდემიის ფარგლებში არჩევნების ჩატარების საკმაოდ დიდი გამოცდილება დაუგროვდა.

ამ ეტაპზე, ჩვენი სამზადისიდან გამომდინარე, არ ვფიქრობთ, რომ არჩევნების გადადების ან პროცესის შეჩერების რაიმე წინაპირობა არსებობს. ბუნებრივია, ამას თავის მხრივ სჭირდება გარკვეული საფუძვლები, გარემოებები, რომ მოხდეს არჩევნების გადადების საკითხის განხილვა, რაც ბუნებრივია აღემატება ცესკო-ს კომპეტენციას და უფლებამოსილებას. როგორც იქნება და რა გადაწყვეტილებაც იქნება მიღებული, ჩვენ შესაბამისად ვიმოქმედებთ. თუმცა, საარჩევნო ადმინისტრაციის მხრიდან, დღეის მდგომარეობით, არ დგას ის საკითხი და მოთხოვნა, რომ არჩევნების გარკვეული ეტაპით გადადება უნდა მოხდეს“, – განაცხადა კალანდარიშვილმა.