ბრიტანეთმა, კანადამ, ავსტრალიამ და პორტუგალიამ პალესტინის სახელმწიფოებრიობა აღიარეს

პორტუგალიის საგარეო საქმეთა მინისტრმა, პაულო რანხელმა 21 სექტემბერს განაცხადა, რომ პორტუგალიამ პალესტინის სახელმწიფოებრიობა ფორმალურად აღიარა.

“პალესტინის სახელმწიფოს აღიარება პორტუგალიის საგარეო პოლიტიკის ფუნდამენტური და მუდმივი ხაზის რეალიზაციას წარმოადგენს,” განუცხადა რანხელმა რეპორტიორებს ნიუ-იორკში.

მისი თქმით, “პორტუგალია ემხრობა ორი-სახელმწიფოს პრინციპს, როგორც ერთადერთ გზას სამართლიანი და გრძელვადიანი მშვიდობის მისაღწევად… და ცეცხლის შეწყვეტა გადაუდებლად აუცილებელია,” თქვა მან და დაამატა, რომ ჰამასს “ვერ უნდა ჰქონდეს ნებისმიერი სახით კონტროლი ღაზაში, ან მის გარეთ.

ცნობისთვის, 21 სექტემბერს პალესტინის სახელმწიფოებრიობა კანადამ, გაერთიანებულმა სამეფომ და ავსტრალიამაც აღიარეს, ხოლო გაეროს გენერალური ასამბლეის შეხვედრაზე იგივე ნაბიჯის გადადგმას კიდევ 6 ქვეყანა აპირებს.

ამ გადაწყვეტილების პასუხად ისრაელის პრემიერმინისტრმა, ბენიამინ ნეთანიაჰუმ განაცხადა, რომ აღნიშნული ქვეყნების ლიდერები “ტერორს აჯილდოებენ” და დაამატა, რომ პალესტინური სახელმწიფო “ვერ ჩამოყალიბდება”.

“მკაფიო გზავნილი მაქვს იმ ლიდერებისთვის, რომლებიც პალესტინის სახელმწიფოს აღიარებენ 7 ოქტომბრის საშინელი ხოცვა-ჟლეტის შემდეგ – თქვენ ტერორს დიდად აჯილდოებთ,” აცხადებს ნეთანიაჰუ გავრცელებულ ვიდეოში.

“მე კიდევ ერთი გზავნილი მაქვს თქვენთვის: ეს არ მოხდება, იორდანიის დასავლეთით პალესტინური სახელმწიფო ვერ ჩამოყალიბდება.” – აღნიშნა ისრაელის პრემიერმა.

ამასთანავე, ისრაელის საგარეო საქმეთა სამინისტროს განცხადებით, ისრაელი “კატეგორიულად” უარყოფს გაერთიანებული სამეფოსა და სხვა სახელმწიფოების მხრიდან პალესტინის სახელმწიფოებრიობის აღიარებას.

“[ეს] უფრო მეტ დესტაბილიზაციას იწვევს რეგიონში და სამომავლოდ პრობლემის მშვიდობიანად გადაჭრის შანსებს ძირს უთხრის.” – წერს ისრაელის საგარეო სამინისტრო X-ზე.

ისრაელის თქმით, ეს “არა მხოლოდ აჯილდოებს ჰოლოკოსტის შემდეგ ებრაელების მიმართ ჩადენილ ყველაზე დიდ ხოცვა-ჟლეტას იმ ტერორისტული ორგანიზაციის მიერ, რომელიც მოითხოვს და ცდილობს ისრაელის განადგურებას, არამედ კიდევ უფრო ამყარებს ჰამასისადმი მხარდაჭერას.”