გაერთიანებული სამეფოს თავდაცვის სამინისტროს დაზვერვის ინფორმაციით, რუსეთმა უკრაინაში ომის დაწყებისას მობილიზებული სახმელეთო ძალების დაახლოებით მესამედი დაკარგა.
სამინისტროს შეფასებით, რუსეთის მიერ წამოწყებული იერიში უკრაინაზე საგრძნობლად ჩამორჩება გრაფიკს. მცირემასშტაბიანი საწყისი წინსვლის მიუხედავად, უკანასკნელი თვეების განმავლობაში რუსეთმა არსებითი ტერიტორიული წინსვლის მიღწევა ვერ შეძლო, მაშინ, როდესაც მისი ჯარი მნიშვნელოვან გამოფიტვას განიცდის.
Institute for the Study of War-ის ანგარიშის მიხედვით, უკრაინის სამხედრო ძალებმა წარმატებული კონტრშეტევების შედეგად, დიდი ალბათობით, ხარკოვის ბრძოლა მოიგეს.
რუსეთის სამხედრო ძალებმა ხარკოვის გარშემო პოზიციების მიტოვება დაიწყეს. ამასთან ერთად, ბოლო 24 საათის განმავლობაში მნიშვნელოვან ტერიტორიულ წინსვლას ვერ მიაღწიეს.
უკრაინის ქვედანაყოფები ბელგოროდსა და იზიუმის ირგვლივ ოკუპანტების შეზღუდვასა და საკომუნიკაციო ხაზების ჩაჭრას ცდილობენ.
ამასთან ერთად, რუსეთის სამხედრო ძალებმა იზიუმ-დონეცკის მიმართულებით მცირე ტერიტორიულ წინსვლას მიაღწიეს. ანგარიშის მიხედვით, ომის ამ ეტაპზე, ოკუპანტების მიზანი ჩრდილოეთიდან და სამხრეთიდან სევეროდონეცკისა და ლისიჩანსკის ალყაში მოქცევაა.
Loading ...
