იაპონიის სოფლის მეურნეობის მინისტრი, ტაკუ ეტო ბრინჯთან დაკავშირებული განცხადებების გამო გადადგა.
“მოქალაქეები ახლა რთულ სიტუაციაში არიან ბრინჯის ფასების მკვეთრი ზრდის გამო და ასეთ დროს გავაკეთე ძალიან შეუსაბამო განცხადება”. – უთხრა ეტომ ჟურნალისტებს მას შემდეგ, რაც გადადგომის შესახებ განაცხადა.
პრემიერმინისტრმა შიგერუ იშიბამ სოფლის მეურნეობის, სატყეო მეურნეობისა და თევზჭერის ახალ მინისტრად ყოფილი გარემოს დაცვის მინისტრი შინჯირო კოიზუმი დანიშნა.
“ბატონ კოიზუმის აქვს გამოცდილება, ხედვა და ენთუზიაზმი აგრარულ და თევზჭერის საკითხებზე რეფორმების გასატარებლად”. – აღნიშნა იშიბამ.
“ყველას გონებაში ახლა მთავარი საზრუნავი ბრინჯის ფასების მატება და იმის შიშია, თუ რამდენად საკმარისია ის ბაზარზე. მინდა ეს შიშები განვაქარწყლო, მართალია, ფართო სპექტრის პასუხისმგებლობა მაქვს, მაგრამ ჩემთვის ამ ეტაპზე მთავარი არის ბრინჯი. ამ თანამდებობას მივუდგები ისეთი დამოკიდებულებით, თითქოს ბრინჯის მინისტრი ვარ”. – თქვა კოიზუმმა.
მანამდე, 19 მაისს, ტაკუ ეტომ ბოდიში მოიხადა მას შემდეგ, რაც განაცხადა, რომ მას “ბრინჯის ყიდვა არასოდეს დასჭირვებია”, რადგან თავისი მხარდამჭერებისგან საჩუქრად იღებდა. ამ სიტყვებმა იაპონელი მოსახლეობის დიდი ნაწილი გააღიზიანა, რომლებიც ბრინჯის რეკორდულად მაღალ ფასებში ყიდულობენ.
19 მაისს ჟურნალისტებთან საუბრისას, ეტომ ბოდიში მოიხადა თავისი კომენტარების გამო და აღნიშნა, რომ, შესაძლოა, სიტყვები არასწორად შეარჩია და გადაჭარბებულად ილაპარაკა, რათა დამსწრე აუდიტორიისთვის თავი მოეწონა. მან თავი აარიდა კითხვას, გეგმავდა თუ არა გადადგომას.
იაპონიის ძირითადი მარცვლეულის საცალო ფასი გასული წლის ამავე პერიოდთან შედარებით თითქმის ორჯერ გაიზარდა. მიზეზი მზარდი ტემპერატურის გამო იაპონიაში მოსავლის შემცირება და ტურიზმის ბუმის მიერ გამოწვეული მოთხოვნის გაზრდაა.
Loading ...