ბოჭორიშვილის კლინიკის მედპერსონალი, რომელსაც კლინიკის დაინფიცირებულ თანამშრომლებთან ჰქონდა შეხება, კარანტინში გადავა

ვახტანგ ბოჭორიშვილის სახელობის კლინიკის სამეთვალყურეო საბჭოს თავმჯდომარის, მაკა სოლოღაშვილის განცხადებით, განიხილება იმ მედპერსონალის კარანტინში გადაყვანა, ვისაც კლინიკის დაინფიცირებულ თანამშრომლებთან ჰქონდათ შეხება.

როგორც სოლოღაშვილმა ჟურნალისტებს განუცხადა, კლინიკის თანამშრომლები ცვლებით მუშაობენ და კლინიკის დატოვების შემდეგ ისინი საკუთარ სახლებში, თვითიზოლაციაში არიან. მისივე თქმით, გარდა ამისა, ხშირად იტესტება კლინიკის აბსოლუტურად ყველა თანამშრომელი.

„მუშაობის პერიოდში კლინიკა დატოვეს, მაგრამ ჩვენი ბოქსირერებული სექტორის ყველა პერსონალი მაქსიმალურად არის განსწავლული და უზრუნველყოფილი იმით, რომ მათ თვითონ მოიწყონ თვითიზოლაცია ოჯახებში. ჩვენი არაერთი ისტორია მოისმინეთ ექთნების, სანისტრების, ექემების, როგორ ენატრებათ შვილები, როგორ ვერ მიდიან ოჯახის წევრებთან, დღემდე ასე გრძელდება იმიტომ, რომ არ შეიძლება მოდუნება და ისინი მაქსიმალურად თვითიზოლაციაში არიან, როდესაც მიდიან კლინიკიდან. მათ აუცილებლად სჭირდებათ სახლში გასვლა, გარემოს შეცვლა, ეს არის ძალიან მძიმე პირობებში მუშაობა. ვაცხადებ, რომ კოვიდის სიმპტომატიკა არ არის მძიმე იმ პაციენტების, ვინც ჩვენ გვყავდა, მაგრამ ძალიან მძიმეა პერსონალის ცხოვრება, ასეთი ადვილი არ არის, ისინი მიდიოდნენ სახლში, მაგრამ პერსონალი თვითონ უზრუნველყოფდა იზოლაციას სახლებში იმიტომ, რომ მათ სჭირდებათ თავიანთი ოჯახის წევრების დაცვა. ასევე ხდებოდა ამ პერსონალთანაც, ჩვენი მეგობარი კომპანიების ხარჯზე მათი ტრანსპორტირებაც საკმაოდ დაცული და იზოლირებული გვქონდა. ეს გარდაუვალი მოხდა. სანიტარს ჰქონდა უშუალო კონტაქტი, ჰქონდა მედდას იმიტომ, რომ ჩვენ დაგვჭირდა ამ პაციენტის გაკავება, ფიზიკურად გაკავება და ისე ვერ მოხდებოდა დაინფიცირება, რომ არა ეს ქმედება. ეს არის ერთი ცვლა.

მედპერსონალი, სრულიად კლინიკა, დაწყებული ხელმძღვანელობით, დაცვის თანამშრომლებით, სანიტრებით, იტესტება გეგმურად, ყოველთვის და გრძელდება ეს გეგმური შემოწმება, რა თქმა უნდა, ჩვეულებრივად. ეს არის ერთი ცვლა, რომელიც ერთად გამოვლინდა და დაინფიცირდა, ამ ეტაპზე კარანტინში გადაყვანა განიხილება, თუმცა პრაქტიკულად კარანტინია მათი მუშაობის ეს სტილი, რომლებიც ცალ-ცალკე არიან, ბოქსირებული სექტორებიც დაყოფილი გვაქვს სექტორებად, სადაც არ ხდება პერსონალის მოძრაობა და კონტაქტი ერთმანეთთან“, – განაცხადა სოლოღაშვილმა.

შეგახსენებთ, ბოლო 24 საათში საქართველოში კორონავირუსით ინფიცირების 8 ახალი შემთხვევა გამოვლინდა, საიდანაც 3 ბოჭორიშვილის კლინიკის 3 თანამშრომელია. მაკა სოლოღაშვილის განცხადებით, მათი კლინიკის თანამშროლები არაადეკვატური ქცევების მქონე პაციენტებისგან დაინფიცირდნენ.

www.interpressnews.ge