“ბიძინა ივანიშვილი მოითხოვდა, შემესრულებინა ყველანაირი დავალება და ამას თეთრი ხელთათმანებით ვერ გავაკეთებდი” – სოსო გოგაშვილის წერილი

სახელმწიფო უსაფრთხოების სამსახურის ყოფილი უფროსი, სოსო გოგაშვილი ციხიდან მორიგ წერილს ავრცელებს და ამბობს, რომ თანამდებობაზე მუშაობის პერიოდში, “ბიძინა ივანიშვილი მოითხოვდა, ყველანაირი დავალება შეესრულებინა”.

გოგაშვილის თქმით, მას შემდეგ, რაც უკანონო დავალებები გახშირდა, გადაწყვიტა, სამსახურიდან წასვლის ნაცვლად, დარჩენილიყო და “სისტემის მხილებისთვის მტკიცებულებები შეეგროვებინა”.

“მოგესალმებით,

დანიშვნის შემდეგ, როდესაც გახშირდა უკანონო დავალებები, მივხვდი, თუ რა სისტემაში აღმოვჩნდი, ამიტომ დავდექი არჩევანის წინაშე. ბიძინა ივანიშვილი მოითხოვდა, შემესრულებინა ყველანაირი დავალება და ამას თეთრი ხელთათმანებით ვერ გავაკეთებდი.

მქონდა სამი არჩევანი:

• 1. სამსახურიდან წამოსვლა
• 2. ყველაფერზე ხელის მოწერა და ჩაყოლა
• 3. დარჩენა, ყველა მტკიცებულების მოგროვება და სისტემის მხილება, რომელიც, ხვდებით, რომ ავირჩიე და ამიტომ ვზივარ აქ.

ვინც მე მაკრიტიკებთ თუ სად ვიყავი აქამდე, გაიარეთ იმ გზის ნახევარი იმ გარემოცვაში, რაც მე მოვახერხე და ისე დამამუნათეთ. ახლა დროის კარგვის ნაცვლად, ჯობია ეს ბინძური სისტემა დავამთავროთ და ჩემს დასჯას ყოველთვის მოახერხებთ, არ ვაპირებ ამ ქვეყნიდან არსად წასვლას”, – წერს სოსო გოგაშვილი.