ბიძინა ივანიშვილი ირაკლი რუხაძეს გაპრემიერებას უპირებს – ივანიშვილის აზრით, რუხაძის ამერიკული პასპორტი აშშ-თან ურთიერთობებს გადატვირთავს – ლაშა ფარულავა

ირაკლი რუხაძეს ბიძინა ივანიშვილი გაპრემიერებას უპირებს. ივანიშვილის აზრით, რუხაძის ამერიკული პასპორტი იქნება მისთვის სასარგებლო და აშშ-თან ურთიერთობებს გადატვირთავს, – ამის შესახებ “ნაციონალური მოძრაობის“ წევრმა ლაშა ფარულავამ “პალიტრანიუსის“ გადაცემა “დღის ნიუსრუმში“ განაცხადა, სადაც ბიზნესმენ ირაკლი რუხაძის მიერ ტელეკომპანია „იმედის“ გაყიდვასთან დაკავშირებულ გადაწყვეტილებაზე ისაუბრა.

როგორც ირაკლი ფარულავამ აღნიშნა, „ბიძინა ივანიშვილს სერიოზული პრობლემა აქვს, ჩიხი და იზოლაცია არის „ქართული ოცნების“ თავს“.

„ირაკლი რუხაძეს ივანიშვილი გაპრემიერებას უპირებს. „ქართული ოცნება“ არის ფსკერზე და ცდილობს, იქნებ როგორმე რუხაძის ამერიკულმა პასპორტმა გადაარჩინოს.

ჩიხში შევიდა ბიძინა ივანიშვილის ურთიერთობები შეერთებულ შტატებთან, ძალიან კარგად იცის, ორბანის ბედი, ძალიან ცუდი პერსპექტივა აქვს არჩევნებზე, კონკურენტთან აგებს. ცხადია, ერთადერთი გამოსავალი არის როგორმე გადატვირთოს ურთიერთობები ამერიკის შეერთებულ შტატებთან. ივანიშვილის აზრით, რუხაძის ამერიკული პასპორტი იქნება მისთვის სასარგებლო და ურთიერთობებს გადატვირთავს.

რეალობაში, ძალიან მარტივად არის საქმე. დემოკრატიული ოპოზიცია და საზოგადოება ერთიანია ორ მთავარ მოთხოვნაში. პირველი: პოლიტპატიმრების გათავისუფლება, ტერორის შეწყვეტა და ახალი არჩევნები. ივანიშვილი კონსტიტუციურ ჩარჩოებში უნდა მოექცეს. წინააღმდეგ შემთხვევაში ის იქნება ქართველი მადურო“,- აღნიშნა ფარულავამ.

რაც შეეხება იტალიაში, ზამთრის ოლიმპიური თამაშების გახსნისადმი მიძღვნილი ღონისძიების ფარგლებში, მიხეილ ყაველაშვილისა და მაკა ბოჭორიშვილის, აშშ-ის ვიცე-პრეზიდენტ ჯეი დი ვენსსა და სახელმწიფო მდივანს მარკო რუბიოსთან გასაუბრების ფაქტს, როგორც ფარულავამ განაცხადა, „დარბიან მიხეილ ყაველაშვილი და მაკა ბოჭორიშვილი რომ ვინმესთან ფოტო გადაიღონ და ამით როგორმე კობახიძე გადაარჩინონ, რომელსაც სერიოზული პრობლემა აქვს“.

მისივე თქმით, „ქართული ოცნება“ საერთაშორისო დონეზე იზოლაციაში მოქცეული, რასაც ფოტოებით, შეხვედრებით, ხელის ჩამორთმევით, „სელფების“ გადაღებით ვერ მოაგვარებს.

“საქართველოსა და ამერიკას შორის ურთიერთობები ჩიხში ივანიშვილმა შეიყვანა, ქართველმა მადურომ. მან ყველაფერი გააკეთა, რომ სტრატეგიული პარტნიორობა დაგვეკარგა აშშ-თან. გადატვირთვა დემოკრატიული ტრანსფორმაციის გარეშე, წარმოუდგენელია. ეს თქვა სახელმწიფო დეპარტამენტმა, როდესაც გამოიტანა ჯეი დი ვენსის ციტატა, რომ დემოკრატიული მანდატი არ მოიპოვება ოპონენტების დევნით და ციხეში ჩასმით. ეს იყო კონკრეტული ტესტი, რომელიც უნდა ჩააბაროს „ქართულმა ოცნებამ“, თუ მას უნდა ურთიერთობების გადატვირთვა. „ქართული ოცნება“ არის საერთაშორისო დონეზე იზოლაციაში, ეს ფოტოებით, შეხვედრებით, ხელის ჩამორთმევით, „სელფების“ გადაღებით ამერიკასთან კი არა, არავისთან არ წყდება. მილანში, ზამთრის ოლიმპიურ თამაშებზე მიხეილ ყაველაშვილის გამო კი არ არის საქართველო, სპორტსმენების გამოა ყაველაშვილი იქ. ქართველი სპორტსმენების დამსახურებით ჩადის ყაველაშვილი და ხელს ართმევს კონკრეტულ პოლიტიკოსებს. ათენში, ოლიმპიური თამაშები რომ ტარდებოდა, ომების კი ჩერდებოდა. პოლიტკორექტულობის ფარგლებში ჯდება ის ქცევა, რომელიც ვიხილეთ: ფოტო, სელფი…დარბიან ყაველაშვილი და ბოჭორიშვილი რომ ვინმესთან ფოტო გადაიღონ და ამით როგორმე კობახიძე გადაარჩინონ, რომელსაც სერიოზული პრობლემა აქვს.

ირაკლი კობახიძეს შეექმნა პრობლემა, მას როგორც საქართველოს ლეგიტიმურ ხელისუფლებას არავინ აღიარებს. ჩვენს რეგიონში ჩამოდის ჯეი დი ვენსი, ჩადის სომხეთსა და აზერბაიჯანში, საუბრობენ ტრანზიტულ მარშრუტებზე, სომხეთი ტრანზიტული მარშრუტის გადართვას იწყებს საქართველოდან აზერბაიჯანისკენ. ჩვენ სესხი ავიღეთ, იმისთვის რომ ყაზბეგისკენ მიმავალი გზა გაგვეკეთებინა და მილიარდ 200 მილიონი სესხად ავიკიდეთ, ეს ფული იმით უნდა გადაგვეხადა, რომ ეს გზა დატვირთული ყოფილიყო, ეს გადავა აზერბაიჯანში. იქ ტვირთი აღარ გაივლის და დამატებითი ფინანსური რესურსი იქნება, რომელიც ხალხს ადგას მხრებზე. ივანიშვილს არ ადარდებს, რომ საქართველოს ყველაფერმა აუარა გზა “, – განაცხადა ფარულავამ.

გარდა ამისა, ლაშა ფარულავამ, ირაკლი კობახიძის პრემიერობის 2 წელი შეაფასა და აღნიშნა, რომ „ეს 2 წელი იყო საქართველოს კონსტიტუციური ჩარჩოებიდან გასვლის, ევროპული საბოტაჟის და იზოლაციის 2 წელი“.