საქართველოს ბაზარზე აშშ-დან იმპორტირებული მეორადი ავტომობილები ძვირდება.
როგორც ავტოიმპორტიორი კომპანიების ნაწილში აცხადებენ, აშშ-ს მიერ 25%-იანი საიმპორტო ტარიფების დაწესებამ აუქციონებზე მანქანებზე ფასები გაზარდა, რაც გარკვეულწილად საქართველოს ავტობაზარზე უკვე აისახა.
როგორც BMG-ის “კავკასიის ავტოიმპორტის” კომერციულმა დირექტორმა, ალექსანდრე ვეკუამ განუცხადა, ფასების ზრდა 10-15%-ით ძირითადად ბიუჯეტურ მეორად ავტომობილებზე ფიქსირდება, რომელთა მიმართულებითაც ქვეყანაში დეფიციტია.
„კავკასიის ავტოიმპორტში“ აცხადებენ, რომ ამ მოცულობით ფასების ზრდა აშშ-დან იმპორტზე არსებით გავლენას ვერ იქონიებს, თუმცა ამ ტენდენციის გაგრძელების შემთხვევაში, შესაძლოა, აშშ-დან საქართველოში მეორადი ავტომობილების იმპორტი შემცირდეს.
„შტატების ორმა უმსხვილესმა მეორადი ავტომობილებით მოვაჭრე აუქციონმა ცოტა ხნის წინ მოგვაწოდა ფასები. დაახლოებით 4.3%-ითაა გაზრდილი მეორად ავტომობილებზე ფასები, რაც ნეგატიურ მოლოდინებს უკავშირდება. ამ მოვლენებს ჩვენთანაც ჰქონდა ერთგვარი რეაქცია. იმ კატეგორიის ავტომობილები, რომლებიც ჩვენთან შედარებით დეფიციტურია, დაახლოებით 10-15%-ით გაძვირდა. ეს ძირითადად ბიუჯეტურ ავტომობილებს ეხება, რომელთა ღირებულებაც 10 ათას დოლარამდეა. თუმცა ზოგადად საქართველოს ამ ეტაპზე საავტომობილო პროფიციტი აქვს და ეს გავლენა სხვა მიმართულებებით შედარებით ნაკლებია. ვფიქრობთ, რომ ფასების ამ მოცულობის ზრდა ვერ გამოიწვევს აშშ-დან საქართველოში ავტომობილების იმპორტის შემცირებას, თუმცა თუკი ტენდენცია გაგრძელდება და ფასები მომავალშიც გაიზრდება, ეს, რა თქმა უნდა, გავლენას მოახდენს იმპორტის შემცირებაზეც“, – განაცხადა ალექსანდრე ვეკუამ.
ცნობისთვის, საქართველოს ეროვნული ბანკის შეფასებით, აშშ-ში ავტოიმპორტზე 25%-იანი ტარიფების დაწესება ზოგადად ავტომობილების საფასურს გაზრდის, რაც საქართველოში აშშ-დან ავტოიმპორტზეც აისახება. სებ-ი მოელის, რომ ეს გარემოება აშშ-დან ავტოიმპორტს შეამცირებს, რაც თავის მხრივ ავტოექსპორტის შემცირებაზე აისახება. სებ-ის წინასწარი შეფასებით, ეფექტი შესაძლოა, 10.8%-საც შეადგენდეს.
www.bm.ge
Loading ...