არაბული მედიის ინფორმაციით, ლიბანში ისრაელის იერიშების შედეგად მოკლულია ლიბანის პარლამენტში “ჰეზბოლას” პოლიტიკური ფრთის ხელმძღვანელი, მოჰამედ რაადი. Al-Arabiya-ს მიხედვით, ბეირუთში მიტანილ იერიშს, სულ მცირე, ათი ადამიანი ემსხვერპლა.
ცნობისთვის, ისრაელის თავდაცვის ძალებმა (IDF) დაადასტურა, რომ ლიბანის ტერიტორიიდან ისრაელის მიმართულებით ნასროლი რაკეტები ირანის მარიონეტულმა ტერორისტულმა დაჯგუფებამ, ჰეზბოლამ გაუშვა, რაც 2024 წლის ნოემბრის ზავის შემდეგ პირველი მსგავსი შემთხვევაა.
სარაკეტო იერიშზე პასუხისმგებლობის აღების შემდეგ ჰეზბოლამ განაცხადა, რომ ეს იყო პასუხი ირანის უზენაესი ლიდერის, აიათოლა ალი ხამენეის სიკვდილზე.
თავის მხრივ, ჰეზბოლას თავდასხმაზე პასუხად ისრაელის არმიამ ლიბანში დაჯგუფების სამიზნეებზე საჰაერო იერიშები მიიტანა.
ჰეზბოლა, რომელიც ისრაელის გასული წლის ოპერაციების შემდეგ დასუსტებული იყო, არ შეუერთდა ირანსა და ისრაელის 2025 წლის ივნისის 11-დღიან ომს. მათ 2024 წლის ნოემბრის ზავის შემდეგ ისრაელის მიმართულებით რაკეტები აქამდე აღარ უსვრიათ.
ისრაელის საჰაერო თავდაცვამ ნასროლი რაკეტებიდან ერთი უვნებელყო. IDF-ის ცნობით, დანარჩენი რაკეტები დაუსახლებელ, გაშლილ სივრცეებში ჩამოვარდა.
Loading ...