ბახმაროში, მდინარე ბახვისწყალზე ახალი საავტომობილო ხიდის მოწყობა იგეგმება

დაბა ბახმაროში, მდინარე ბახვისწყალზე, ახალი საავტომობილო ხიდის მოწყობა იგეგმება.

საავტომობილო გზების დეპარტამენტმა საპროექტო, სახარჯთაღრიცხვო და სატენდერო პროცედურების ჩატარებასთან დაკავშირებული ტექნიკური დოკუმენტების შედგენისთვის ბაზრის კვლევა გამოაცხადა.

შესყიდვის თანახმად, დაგეგმილია ახალი ხიდის მშენებლობა, ამასთანავე, ხიდამდე მისასვლელი გზების, სარეგულაციო და დამცავი ნაგებობების მოწყობა.

ტექნიკურ დავალებაში ვკითხულობთ, რომ მდინარე ბახვისწყალზე არსებული ხიდი ვეღარ უზრუნველყოფს ფეხით მოსიარულეთა მზარდი ნაკადის უსაფრთხოდ გატარებას.

„არსებული ხიდი არანაირ სტანდარტში არ ჯდება“

„დაბა ბახმაროს ტერიტორიაზე, მდინარე ბახვისწყალზე არსებული საფეხმავლო ხიდი, რომელიც ვეღარ უზრუნველყოფს დამსვენებლების (განსაკუთრებით სადღესასწაულო დღეებში) მზარდი ნაკადის შეუფერხებლად გატარებას. მდინარე ბახვისწყლის ორივე ნაპირი განაშენიანებულია და ზემოაღნიშნული საფეხმავლო ხიდი აკავშირებს ორ უბანს დაბის ცენტრთან.

აღნიშნული ხიდი ფაქტობრივად არანაირ სტანდარტში არ ჯდება და ვიზუალურად, მისი ტექნიკური მდგომარეობა ვეღარ უზრუნველყოფს ფეხით მოსიარულეთა მზარდი ნაკადის უსაფრთხოდ გატარებას. აღსანიშნავია, რომ კურორტში ყოველწლიურად მატულობს განაშენიანების პროცესი.

ზემოაღნიშნული საავტომობილო ხიდის მოწყობა უზრუნველყოფს მოქალაქეთა უსაფრთხო და შეუფერხებელ გადაადგილებას, ამასთან ერთად ხელს შეუწყობს კურორტის შემდგომ განვითარებას“, – ვკითხულობთ ტექნიკურ დავალებაში.

ინფორმაციისთვის, წინადადებების მიღება 19 მარტს იწყება და 20 მარტს სრულდება.

www.bpn.ge