„ბარსელონამ“ რონალდ კუმანი დაითხოვა

„ბარსელონას“ მთავარმა მწვრთნელმა რონალდ კუმანმა პოსტი დატოვა. კატალონურმა კლუბმა გამოაცხადა 58 წლის სპეციალისტის განთავისუფლების შესახებ.

„ბარსელონამ“ ოთხშაბათს, ლა ლიგას მე-11 ტურში 0:1 წააგო „რაიო ვალეკანოსთან“ და სწორედ ამის შემდეგ თქვა კლუბის პრეზიდენტმა ჟოან ლაპორტამ კუმანის წასვლის შესახებ.

წინა ტურში „ბარსელონამ“ შინ წააგო „რეალთან“ „ელ კლასიკო“. გუნდს 10 მატჩში 15 ქულა აქვს და ცხრილში მეცხრე ადგილზეა. ჩემპიონთა ლიგაზე გუნდს სამ ტურში სამი ქულა აქვს და მესამე ადგილი უკავია.

შეგახსენებთ, რომ 2020 წელს, კუმანმა ნიდერლანდების ნაკრების მთავარი მწვრთნელის პოსტი დატოვა, რათა „ბარსელონაში“ გაეგრძელებინა კარიერა.

რონალდ კუმანის განთავისუფლების შემდეგ, „ბარსელონა“ აპირებს მთავარ მწვრთნელად კლუბის ყოფილი ნახევარმცველი ჩავი მიიწვიოს. კატალონელებს იმედი აქვთ, რომ ხუთშაბათისთვის ყველა დეტალს მოაგვარებენ, – იტყობინება ინტერნეტ-ტელევიზია El Chiringuito TV.

ჩავიმ თავისი კარიერის დიდი ნაწილი „ბარსელონაში“ (1998-2015) გაატარა და კლუბთან ერთად 25 ტიტული მოიპოვა, მათ შორის ოთხჯერ მოიგო ჩემპიონთა ლიგა და რვაჯერ – ესპანეთის ჩემპიონატი.

2015 წელს, ის ყატარის „ალ-სადში“ გადავიდა, 2019 წელს კი ამ კლუბში სამწვრთნელო კარიერა დაიწყო და გუნდს შვიდი ტიტული მოაგებინა.