აშშ-ის პრეზიდენტმა ჯო ბაიდენმა ხელი მოაწერა კონგრესის მიერ მხარდაჭერილ „აქტს ქორწინების პატივისცემის შესახებ“, რომელიც ერთი და იმავე სქესის ადამიანებს შორის და სხვადასხვა რასის წარმომადგენლებს შორის ქორწინების უფლებას აკანონებს.
კანონის დამტკიცება მოწმობს ამერიკულ საზოგადოებაში ერთი და იმავე სქესის წარმომადგენლების ქორწინებისადმი დამოკიდებულების მკვეთრ ცვლილებას. კონგრესმა 1996 წელს მიიღო „ქორწინების დაცვის აქტი“, რომელიც ქორწინებას განსაზღვრავდა, როგორც ქალისა და მამაკაცის კავშირს. ჯო ბაიდენმა, რომელიც იმ დროს სენატორი იყო, მაშინ კანონპროექტს მხარი დაუჭირა. რამდენიმე წლის შემდეგ, შტატებმა ერთი და იმავე სქესის ადამიანებს შორის კავშირის ლეგალიზება, შემდეგ კი ქორწინების უფლების დაკანონება დაიწყეს.
2015 წელს აშშ-ის უზენაესმა სასამართლომ დაადგინა, რომ უფლება იქორწინონ ერთი და იმავე სქესის მქონე ადამიანებმა, დაცულია ქვეყნის კონსტიტუციით. თუმცა ეს უფლება კანონით არ იყო გამყარებული და როგორც ამ კანონის ინიციატორები მიიჩნევდნენ, არსებობდა შესაძლებლობა, რომ უზენაესი სასამართლოს კონსერვატიულ უმრავლესობას 2015 წლის გადაწყვეტილებისთვის გადაეხედა.
კანონი შტატებს უტოვებს თავისუფლებას, არ დაარეგისტრირონ ერთი და იმავე სქესის ადამიანთა ქორწინება, მაგრამ ავალდებულებს მათ, სხვა შტატებში გაფორმებული ქორწინება აღიარონ.
Loading ...