ბათუმის მერიასთან უსახლკაროები აქციას მართავენ. მათი თქმით, ადგილზე დარჩებიან, ვიდრე აჭარის მთავრობა და ბათუმის მერია შესაბამის რეაგირებას არ მოახდენენ. აქციის მონაწილეებთან ერთად არის აჭარის უმაღლესი საბჭოს ყოფილი წევრი, მერაბ ბლადაძეც. ის აქციის ერთ-ერთი ორგანიზატორია.
უსახლკაროები ბათუმის მერის ჩიქოვანის გადადგომას ითხოვენ.
აქციის წევრები ითხოვენ მერიამ ისინი საბინაო ფონდიდან დააკმაყოფილოს. მათ დღეს ასევე გააჟღერეს მოთხოვნა ბათუმში, გოგოლის ქუჩაზე უკანონოდ აშენებულ კორპუსებთან დაკავშირებით. აქციის მონაწილეები სთხოვენ მთავრობას, მოელაპარაკოს მესაკუთრე კომპანიას ამ კორპუსების დათმობაზე, შემდეგ კი ისინი ამ კორპუსებში შეასახლოს.
კომპანიის მფლობელი ბიზნესმენი გალიფ ოზთურქია, რომელიც დაკავებულია.
დღეს, 3 ოქტომბერს, უსახლკაროები აქციაზე ბიძინა ივანიშვილთან შეხვედრასაც ითხოვდნენ. ერთ-ერთმა თქვა ისიც, რომ საცხოვრებლის გადაცემას კანონიერად ითხოვენ და არსად შეჭრას არ აპირებენ.
მერაბ ბლადაძემ თავის გამოსვლაში მოუწოდა მოქალაქეებს, აქციის მონაწილეებს საკვებით და ღამით გასათბობად საჭირო ნივთებით დაეხმარონ, რადგან დაშლას არ აპირებენ.
2024 წლის აგვისტოში ბათუმის მერიამ უსახლკაროთა რეგისტრაციის წესი შეცვალა. ახალი წესის მიხედვით, შეიცვალა ჩანაწერი ქირით ცხოვრების ვადის თაობაზე. ძველი წესის მიხედვით, განმცხადებელს ბათუმში ქირით მინიმუმ 6 თვით უწყვეტად ცხოვრების ცნობა უნდა წარედგინა კომისიისთვის, ეს ვადა ერთ წლამდე გაიზარდა. ასევე, მოთხოვნებიდან ამოიღეს ჩანაწერი „ოჯახური დასაბუთება“. მერიაში მიიჩნევენ, რომ ეს სუბიექტური და არარელევანტურიa.
წყარო – ბათუმელები
Loading ...
