აჭარაში კორონავირუსით გარდაცვლილი ათი პაციენტიდან ერთი 32 წლის ქალია, რომელსაც თანმხლები დაავადებები არ აღენიშნებოდა.
შემთხვევა ბათუმის რესპუბლიკურ საავადმყოფოში დაფიქსირდა.
როგორც კლინიკის მენეჯერმა, გია კიკაბიძემ განმარტა, კომპიუტერული ტომოგრაფიის შედეგად გამოჩნდა, რომ პაციენტს ფილტვის 80 პროცენტი დაზიანებული ჰქონდა.
„გუშინ რესპუბლიკურ საავადმყოფოში გარდაიცვალა 32 წლის ქალბატონი, რომელიც ოთხ ნოემბერს შემოიყვანეს კლინიკაში. შემოყვანისთანავე ავადმყოფის მდგომარეობა იყო მძიმე. აღენიშნებოდა სუნთქვის მწვავე უკმარისობა, ციანოზი იყო გამოხატული. სასწრაფოდ გაუკეთდა კომპიუტერული ტომოგრაფია, სადაც გამოჩნდა ფილტვის 80 პროცენტის დაზიანება. იმ წუთასვე გადავიყვანეთ რეანიმაციულ განყოფილებაში და რამდენიმე საათში დაგვჭირდა ინტუბაცია. მიუხედავად ჩატარებული მკურნალობისა, მისი მდგომარეობა არ გაუმჯობესდა. განვითარდა მწვავე რესპირაციული დისტრეს სინდრომი, რასაც დაერთო თირკმლის მწვავე უკმარისობა და სამწუხაროდ, გუშინ გარდაიცვალა.
დეტალები არ არის ცნობილი, მაგრამ ფილტვის 80 პროცენტის დაზიანება ერთ და ორ დღეში არ ხდება. თანმხლები დაავადებები არაფერი არ ჰქონდა. კოვიდის გამო ჰქონდა ორმხრივი პნევმონია, განვითარდა სუნთქვის მწვავე უკმარისობა, შემოსვლის დროს სატურაცია იყო ძალიან დაბალი. თავის ტვინის კომპიუტერიც გადავუღეთ. პათოლიგიური პროცესი არ იყო თავის ტვინში. აღმოჩნდა ფილტვების 80-პროცენტიანი დაზიანება მოსვლისთანავე, ე.ი. ეს იყო კოვიდის გართულება“, – განაცხადა კიკაბიძემ.
Loading ...