ბათუმში, ერთ-ერთ ახალ კორპუსში, გაზის მილები ფასადიდან შეიყვანეს

ბათუმში, ერთ-ერთ ახალ კორპუსში, აეროპორტის ქუჩა #73-ში, გაზის მილები პირდაპირ ფასადიდან შეიყვანეს. ინფორმაციას და ფოტომასალა Facebook-ზე მომხმარებელი ლაშა წულუკიძემ პირველ ნოემბერს გაავრცელა.

“როგორც იცით, „სემეკ“-მა „სალიცენზიო პირობების შეუსრულებლობის გამო შპს „სოკარ ჯორჯია გაზი“-ს გაფრთხილების თაობაზე“ 2022 წლის 18 აგვისტოს N36/16 განკარგულებით ცალსახად და ნათლად განუმარტა „სოკარი“-ს უცოდინარ და ხარბ რეგიონალურ დირექტორს ვახტანგ ბერიშვილს არსებული დარღვევების თაობაზე, მისცა კონკრეტული დრო დარღვევების გამოსასწორებლად … მაშინ როცა ლიცენზიანტი უნდა ეძებდეს გზებს ქალაქს როგორ მოაშოროს „შენელებული მოქმედების ნაღმი“ რჩებათ დრო და ჰყოფნით უვიცობა ქალაქის იერსახის დამახინჯებაც დაუმატონ ყველა მათ „დამსახურებას“ ჩვენი თანაქალაქელების მიმართ”, – წერს ლაშა წულუკიძე.

მოქალაქე ამბობს, რომ ქმნის არასამთავრობო ორგანიზაციას, სადაც ყველა დაინტერესებული პირი შეძლებს გაწევრიანებას. ისინი მონიტორინგს გაუწევენ “სოკარს”.

აღნიშნულთან დაკავშირებით, გამოცემა “ბათუმელებთან”,  “სოკარ გაზი აჭარას” ხელმძღვანელი, ვახტანგ ბერიშვილი ამბობს, რომ – “მილები შეიფუთება, არავითარი დარღვევა არ არის. და მილების გარედან შეყვანა ზოგიერთ შემთხვევაში უფრო მოსახერხებელია”.

მისივე მტკიეცბით, კომპანია ადრეც იყენებდა მსგავს პრაქტიკას:

“მისამართი ასე არ მახსოვს, მაგრამ იყო მსგავსი პრაქტიკა ადრეც, რამდენიმე კორპუსია ასეთი”, – ამბობს ბერიშვილი ბერიშვილი..