ბათუმში ბიზნესმენ გალიფ ოზთურქის მფლობელობაში არსებულ კომპანიაში საგამოძიებო მოქმედებები მიმდინარეობს

როგორც რადიო თავისუფლების კორესპონდენტი ადგილიდან იტყობინება, ბათუმში თურქი ბიზნესმენის გალიფ ოზთურქის კომპანია „მეტროსითის“ მფლობელობაში არსებულ სასტუმრო „ეიფორიაში“ ფინანსთა სამინისტროს საგამოძიებო სამსახურის საგამოძიებო მოქმედებები მიმდინარეობს.

მისი ინფორმაციით, შენობაში იმყოფებიან საგამოძიებო უწყების წარმომადგენლები. „ეიფორიის“ თანამშრომლები შენობის მიმდებარე ტერიტორიაზე გამოსული იყვნენ და საგამოძიებო მოქმედებებს აპროტესტებენ. მათი განცხადებით დღეს დაიბლოკა კომპანიის საბანკო ანგარიშები. ბიზნესმენი გალიფ ოზთურქი კი შენობის მეხუთე სართულზე იმყოფება საგამოძიებო უწყების წარმომადგენლებლთან ერთად. მათივე თქმით, კომპანიის შენობიდან გაიტანეს კომპიუტერები და საბუთები. კომპანიის ერთ-ერთი თანამშრომლის მოწოდების შემდეგ შენობის გარეთ მყოფმა თანამშრომლებმა შეწყვიტეს ოზთურქის მხარდამჭერი შეძახილების სკანდირედა და შენობაში შევიდნენ.

ფინანსთა სამინისტრსო საგამოძიებო სამსახურში რადიო თავისუფლებას ბათუმში ერთ-ერთ კომპანიაში მიმდინარე საგამოძიებო მოქმედებების შესახებ ინფორმაცია დაუდასტურეს დამატებითი დეტალების გახმაურების გარეშე. უწყების წარმომადგენლის განცხადებით, დამატებით ინფორმაციას მოგვიანებით გაავრცელებენ.

ბათუმში მოღვაწე თურქი ბიზნესმენის, გალიფ ოზთურქის სახელს პოლიტიკური პარტიები, ექსპერტებო თუ მედიასაშუალებები აქტიურად უკავშირებდნენ, ბათუმში, გოგოლის ქუჩაზე წამოწყებულ მასშტაბურ უკანონო მშენებლობას.

8 თებერვალს მშენებლობის მიმდებარე ტერიტორიაზე მცხოვრებმა ადამიანებმა რადიო თავისუფლების კორესპონდენტს უთხრეს, რომ „დაახლოებით ერთი კვირაა, რაც მშენებლობა შეჩერდა“.

ამ დასახლებას ადგილობრივებმა „ჩინელების დასახლება“ დაარქვეს, რადგან აქვთ მოლოდინი, რომ ადრე თუ გვიან, ამ კორპუსებში ჩინეთის მოქალაქეებს შეასახლებენ.

www.radiotavisupleba.ge