“ბავშვს ზედმეტი სტერილურობა და სისუფთავე არ სჭირდება”- გიორგი ღოღობერიძის 5 რჩევა, რომ ბავშვი ნაკლებად დაავადდეს

ექიმი გიორგი ღოღობერიძე გადაცემაში “მთავარი დიაგნოზი” 5 რჩევას ასახელებს, რომ ბავშვი ნაკლებად დაავადდეს და მისი იმუნური სისტემა ძლიერი იყოს:

– ბავშვს ზედმეტი სტერილურობა და სისუფთავე არ სჭირდება. შევადაროთ სტატისტიკა: რომ ნახოთ, აფრიკაში დაავადებულ ბავშვთა სიხშირე, რომელთაც ალერგიული, აუტოიმუნური დაავადებები აქვთ და ამერიკაში, იმავე ასაკის ბავშვების სიხშირე, იმავე დაავადებებით, აღმოაჩენთ, რომ სტატისტიკა ერთი და იგივე არ არის. აფრიკაში, შედარებით ცუდ პირობებში გაზრდილი ბავშვი, ამ მხრივ უფრო ჯანმრთელია.

შეხედეთ ჩვენს გარშემო არსებულ რეალობასაც – ქუჩაში მზარდი ბავშვები ბევრად უფრო ჯანსაღები, გაკაჟებულები და ძლიერები არიან, ვიდრე ის ბავშვი, რომელსაც მშობელი 24 საათის განმავლობაში თავზე დაჰყურებს, ხილს კარგად უთლის, ხელებს მილიონჯერ გადააბანინებს, ტანსაცმელს დღეში რამდენჯერმე ურეცხავს – ასეთ პირობებში გაზრდილი ბავშვები სუსტები არიან.

ამას ძალიან მარტივი ახსნა აქვს. თუ ბავშვის იმუნური სისტემა არანაირ პათოგენს არ ხვდება, არც ვირუსს, არც ბაქტერიას, არც სოკოსა და პარაზიტს იცნობს, როგორ უნდა იბრძოლოს? პირობითად, თუ არასდროს გივარჯიშია და პირდაპირ რინგზე სეხვალ, ბრძოლას მოიგებ? ვერა, იმიტომ, რომ არანაირი გამოცდილება არ გაქვს. ასეა ბავშვების შემთხვევაშიც, თუ გინდათ, რომ თქვენი შვილის იმუნური სისტემა ძლიერი იყოს, მიეცით საშუალება, რომ ინფექციებთან ცოტა კონტაქტი ჰქონდეს. ზედმეტი სტერილურობა საჭირო არ არის.

ცოტაოდენი ჭუჭყი, ტალახი, ქვიშაში თამაში ეს საჭიროა, რადგან ასე ხდება პათოგენებთან კონტაქტი და ასე შეუძლია მის იმუნურ სისტემას, რომ ივარჯიშოს და საკუთარი თავი გაიძლიეროს. ეს პირველი და ძალიან მნიშვნელოვანი რჩევაა.

მეორე, ძალიან ბევრ მშობელს ჰგონია, რომ თუ ბავშვს ვიტამინების ნაკრებს დაალევინებს, მისი შვილი უფრო ძლიერი იქნება. ეს არ არის სწორი. თუ თქვენ გინდათ, რომ ბავშვის იმუნური სისტემა ძალიან ძლიერი იყოს, შეეშვით ქიმიურ დანამატებს. სასურველია, მან ეს ნივთიერებები საკვების სახით მიიღოს. მიეცით ხილი, მაგალითად, ვაშლი, ბანანი, სხვადასხვა ბოსტნეული. D ვიტამინის ხელოვნურად მიცემას, გაუშვით ეზოში, ითამაშოს მზის სხვივების ქვეშ – ეს მიდგომა უფრო სწორია.

მესამე რჩევა – რა ქნას მშობელმა, თუ მისი შვილი საჭმელს არ ჭამს? ბავშვმა რომ ჭამოს, მადა სჭირდება. მადა კი როგორ ექნება, თუ 24/7-ზე სახლშია და გარეთ არ გადის? თუ გინდათ, რომ თქვენს შვილს მადა ჰქონდეს, გაუშვით ეზოში, ირბინოს, ფეხბურთი, კალათბურთი ითამაშოს, დახარჯოს ენერგია და სახლში რომ მოვა, მგელივით იქნება. თუ ბავშვი საკვებს იღებს, მაგრამ ენერგიას ვერ ხარჯავს, წონაში მოიმატებს, წონაში მომატებით კი მეორე ტიპის დიაბეტისკენ გაუჩნდება მიდრეკილება. ამიტომ, თუ თქვენს შვილს ჭამა არ უნდა, ზედმეტი ჩარევა საჭირო არ არის. ჯობს, რომ ფიზიკურად დატვირთოთ და თავად გაუჩნდება საკვების მიღების სურვილი.

მეოთხე რჩევა, თუ ბავშვი ეზოში გაუშვით, ირბინა, დახარჯა ენერგია და სახლში მოსულს შია, მნიშვნელოვანია იმის განსაზღვრა, თუ რა მივცეთ. ჯობს, რომ ყურადღებით იყოთ, სასურველია, ისეთი საკვები, რაც დიდი რაოდენობით მარტივ ნახშირწყლებს შეიცავს, ნაკლებად მივცეთ. ძალიან ბევრი ტკიბეული, გამაგრილებელი სასმელი, შაქრის შემცველი საკვები შევზღუდოთ, რადგან მსგავსი პროდუქტები ინსულინის რაოდენობას მკვეთრად ზრდის. ეს კი კანქვეშა ცხიმოვანი მასის მატებას იწვევს და ბავშვი ჭარბწონიანობისკენ იქნება მიდრეკილი. ამას ჯობს, რომ რთული ნახშირწყლების შემცველი საკვები მივცეთ, რომლებიც ორგანიზმში ნელ-ნელა შეიწოვება და სხეულს ეტაპობრივად მოხმარდება.

მეხუთე, ოქროს რჩევა ასეთია – თუ ბავშვი 24/7-ზე იმეცადინებს და ივარჯიშებს, როდის უნდა აღიდგინოს ენერგია? მას სწორი დასვენება სჭირდება. მართალია, ზაფხული უკვე მიილია, მაგრამ შეგიძლიათ შაბათ-კვირა გამოიყენოთ, გაუშვათ სოფელში, იქ ჰაერი ბევრად უფრო სუფთაა. ასევე, სოფელსა და ქალაქში არსებული ბოსტნეული ერთი და იგივე ხარისხის არ არის. იქ ბევრად უფრო ჯანსაღია. ასევე, ბებია-ბაბუას ნახავს და ბავშვის იმუნური სისტემისთვის დადებითი ემოციები ისეთივე მნიშვნელოვანია, როგორც საკვები, ფიზიკური აქტივობა, სწორი ძილი და სწორი მიდგომები.

წყარო – მშობლები.გე