ავღანეთში, ბაგრამის აეროდრომთან, უდიდესი ამერიკული საავიაციო ბაზის მახლობლად ორი დანაღმული ავტომანქანა აფეთქდა. აფეთქების შემდეგ შეიარაღებული თავდამსხმელები დაუპირისპირდნენ უსაფრთხოების ძალების წარმომადგენლებს.
ნატოს “მტკიცე მხარდაჭერის” მისიის ინფორმაციით, თავდასხმის სამიზნე იყო ბაგრამის ბაზის მახლობლად, ადგილობრივი მოსახლეობის დასახმარებლად მშენებარე სამედიცინო დაწესებულება. მისიის პრესსამსახურის ცნობით, თავდასხმა სწრაფად მოიგერიეს, თუმცა მშენებარე ობიექტი სერიოზულად დაზიანდა.
“მტკიცე მხარდაჭერის” მისიის პრესსამსახურის ინფორმაციით, კოალიციურ ძალებში დანაკარგი არ არის და ბაგრამის საავიაციო ბაზა თავდასხმის განმავლობაში უსაფრთხოდ რჩებოდა. ბაგრამის ბაზაზე, ნატოს კოალიციური ძალების შემადგენლობაში, აშშ-ის სარდლობის დაქვემდებარებაში, მისიას ასრულებენ ქართველი სამხედროებიც.
რადიო თავისუფლების ავღანურ სამსახურს მოჰყავს ადგილობრივი საავადმყოფოს ექიმის განცხადება, რომ ბაგრამის ბაზასთან მშენებარე სამედიცინო დაწესებულება ცეცხლით იყო მოცული. ექიმის ინფორმაციით, მის საავადმყოფოში ხუთი დაჭრილი მიიყვანეს. მათ ეროვნებას არ ასახელებენ.
თავდასხმაზე პასუხისმგებლობა ჯერჯერობით არცერთ დაჯგუფებას არ აუღია.
www.radiotavisupleba.ge
Loading ...