ახალ ვარიანტს “ომიკრონი” დაარქვეს და “შეშფოთების ვარიანტის” კლასიფიკაცია მისცეს

ჯანდაცვის მსოფლიო ორგანიზაციამ კორონავირუსის ახალ ვარიანტს, რომელიც სამხრეთ აფრიკაში აღმოაჩინეს (B.1.1.529), ომიკრონი დაარქვა. გაეროს ჯანდაცვის წამყვანმა უწყებამ მას “შეშფოთების ვარიანტის” კლასიფიკაცია მიანიჭა.

ჯანდაცვის სპეციალისტები ახალი ვარიანტის შესაძლო გავრცელების უნარით შეშფოთებულები არიან, რადგან მას მუტაციების უჩვეულო კრებული აქვს. “წინასწარი მტკიცებულებების მიხედვით, ამ ვარიანტს სხვებთან შედარებით, რეინფექციის გაზრდილი რისკი აქვს” – აცხადებს ჯანმო.

სპეციალისტები არ გამორიცხავენ, რომ მას ადამიანის იმუნიტეტისგან და ვაქცინებისგან თავის დაღწევის მეტი შანსიც ჰქონდეს. თუმცა, ჯერჯერობით, დაზუსტებით ამის თქმა შეუძლებელია.

ჯანდაცვის მსოფლიო ორგანიზაციას კვირები დასჭირდება ახალ ვარიანტთან დაკავშირებით, დიაგნოსტიკის, თერაპიის და ვაქცინების ზემოქმედების შესასწავლად. სამხრეთ აფრიკის მონაცემებით, ომიკრონით ინფიცირების შემთხვევები თითქმის ყველა პროვინციაში იზრდება.

პარალელურად, დღესვე, ომიკრონის პირველი შემთხვევა ევროპაში, ბელგიაში აღმოაჩინეს. პრესკონფერენციაზე ბელგიის ჯანდაცვის მინისტრმა განაცხადა, რომ ინფიცირებული აუცრელი იყო. მას ჯერ სიმპტომები განუვითარდა, დიაგნოზი კი 22 ნოემბერს აქვს დასმული.