ახალქალაქში არასრულწლოვნებს შორის მომხდარი ჩხუბის დროს 17 წლის ბიჭი დაჭრეს, იგი ჯერ ახალქალაქის, შემდეგ კი თბილისის ერთ–ერთ კლინიკაში გადაიყვანეს. ადგილობრივების თქმით, დაპირისპირება ქალაქის ცენტრალური პარკის მიმდებარე ტერიტორიაზე მოხდა. ახალგაზრდას ჭრილობა სავარაუდოდ დანით აქვს მიყენებული.
„პატარებს შორის იყო ჩხუბი, დაახლოებით ორი დღის წინ, ღამე მოხდა და ამიტომ ბევრმა არ იცის ეს ამბავი. როგორც გავიგეთ ეს ბიჭი გასაშველებლად მისულა და მაშინ დაჭრეს“,-გვითხრეს ახალქალაქელებმა.
ჩხუბის დროს დაშავებულ არასრულწლოვანს ოპერაცია ახალქალაქის კლინიკაში გაუკეთეს. მისი მდგომარეობა სამედიცინო დაწესებულებაში შეყვანისას მძიმე იყო.
„ჭრილობა იყო მუცლის ღრუში შემავალი, ღვიძლის დაზიანებით და ასევე ჰქონდა ჰემორაგიული შოკი. ოპერაცია ჩაუტარდა წარმატებით და გადაყვანილია თბილისში, სამი ლიტრი სისხლი ჰქონდა დაკარგული“,-გვითხრა კლინიკის დირექტორმა ალექსანდრ თოროიანმა.
დაჭრილი ახალგაზრდის ოჯახის წევრები ამჟამად სახლში არ იმყოფებიან, მეზობლები კი ამბობენ, რომ მომხდარის შესახებ ინფორმაცია არ აქვთ: „თბილისში არიან, გუშინ დილით გავიგე რომ ბავშვს რაღაც დაემართა, ზუსტად არ ვიცი, ჩხუბი იყო თუ რაღაც მსგავსი“-გვითხრეს მეზობლებმა.
შინაგან საქმეთა სამინისიტროს განცხადებით, მომხდართან დაკავშირებით გამოძიება სსკ–ის 117–ე მუხლით მიმდინარეობს, რაც ჯანმრთელობის განზრახ დაზიანებას გულისხმობს, აღნიშნული ქმედება ისჯება თავისუფლების აღკვეთით ვადით სამიდან ექვს წლამდე.
წყარო: sknews.ge
Loading ...